（洗唔洗咁撚多人影老鼠呀？！CALL 食環啦直接！）

Disney Tsum Tsum 都推出了一年有多，本來只有日本版，後來推出瘦身版（即呃秤版）的國際VERSION，現在連國際版都有得玩BINGO。

迪士尼見Tsum Tsum 大受歡迎，不斷推出相關產品，大小毛公仔、手機殼、鑰匙扣乜乜乜，應有盡有，上週開始在九龍塘又一城搞Tsum Tsum Festival，更加係搞到現場人群接踵摩肩。

講咁多，講遊戲心得之前，梗係要利申先：老早就LV99，最高分數六百多萬。(其實佢而家已經去到1200萬)

新手心得

——鳩INVITE！！！！！！儲錢！！！！！！！！！！！

剛剛下載遊戲，玩家只有廢野，米奇老鼠乜乜乜，呢D 都係唔洗理佢（雖然玩BINGO係有用），最重要係瘋狂INVITE 朋友，反正平日都有一D 齋收完卡片入電話落手機就老死不相往來既「朋友」，就唔好驚唔好怕得罪佢地啦，INVITE 啦！ ((拿～後果自負呀下～～))每INVITE 一個有＄500，首次INVITE 滿5位、15位及30位都有獎品，分別是＄10000抽一次的Happiness Box, ＄30000抽一次的Premium Box 同埋特別公仔Toy Story 的三眼仔。如果你在Premium Box 抽到好野就梗係恭喜你，但抽唔到都無壞，仲有隻三眼仔。玩Tsum Tsum 我唔建議刷首抽，倒不如玩多幾局仲好。

三眼仔對乜都無o係手既素人來講，其實都好好用，佢技能係將某種公仔全部抽走然後在上面跌番落來，咁聰明既讀者就會知道，咁咪可以在上面連長CHAIN 囉～對呀，巧開針的～～

長CHAIN 對於新手來說係最重要，因為新手乜都無謂講，最缺係錢，而Tsum Tsum 呢隻遊戲呢，CHAIN 越長，跌錢係幾何級數上的，4粒CHAIN只係跌＄1，像我呢老手，30CHAIN都係平常事呢，係講緊跌幾百幾蚊的。所以，最緊要連長CHAIN 唷，COMBO 反而好睇唔好食的。

用三眼仔不斷玩玩玩，就會開始有錢，我既經驗係，一有錢就抽＄10000公仔，抽呀抽呀，唔好回頭唔好諗，無論出咩廢野都唔好理，直至你抽到松鼠（Chip 或 Dale）！

——鋼牙和大鼻的HEHE天下？！

呢兩隻「好友」（唔知是咪HEHE），各自的特技差不多，都係將一定範圍內的公仔變曬做佢個friend（用Chip 變Dale ，相反亦然）。

我自己則較喜歡用Dale，因為Dale 個範圍係打橫，當玩家累積經驗和技巧，就會有能力駕馭局面，先將一定數目的Dale 積存在底部，然後再用技能，如是者就可以連超長CHAIN！我最高紀錄係35（技能LV3）：）

有了Chip 或 Dale ，分數應該有機會過百萬。呢個時候開始，我仍然堅持有錢即抽＄10000，抽呀抽呀抽呀，直到累積抽了7隻Dale，技能LV3。

玩到呢個時候，玩家應該有一定技巧，用LV3 的Dale 應該可以輕易過兩三百萬分，每週能過三百萬，即可得到分數獎金上限＄10000。（睇下我段片囉，真係好容易二百幾萬的）

此後，玩家就可以開始專心抽Premium Box 喇～（＄30000一次，感謝惠顧）

（其他開心盒的公仔從略，全部廢的。順帶一提，每隻開心盒的公仔都只可以抽7次到LV3，滿技的公仔不會再出現，放心抽啦～而如果之後有閒錢，我建議每隻開心盒公仔都至少一隻LV1在手，咁就可以俾佢升呢。D 乜鳩跳跳虎呀伊痾呀唐老鴨呀就由鳩得佢擺係度獻世。）

——妙用BUBBLE

BUBBLE 呢個名真係錯曬，其實呢D 明明係炸彈！不過Tsum Tsum 係可愛型遊戲，唔可以咁暴戾架嘛，咪叫波波囉：）

講返正題，BUBBLE 主要在兩個時候最有用：

1）未入FEVER 時狂消，瞬間進入FEVER：

玩家無論用那隻公仔，都應該無時無刻儘快進入FEVER，FEVER 中COMBO 數不會限時，亦有分數BONUS，最緊要係每逢進入FEVER 就會延時5秒！！！

2）連長CHAIN 後，瞬間消公仔，節省時間：

這個特點對轉公仔技能的主角，例如唐老鴨條女Daisy鴨、兩隻HEHE松鼠Chip & Dale、米奇條女米妮老鼠，就最有用，因為佢地開技後轉公仔，然後玩家就要把很多很多公仔連上，用長CHAIN 衝分衝錢，問題係，長CHAIN 的公仔會慢慢慢慢慢慢慢慢逐粒消，在爭分奪秒的遊戲真係想打人的，所以大家緊記，連完長CHAIN 後隨即按爆一粒炸……丫唔係……係波波，就可以瞬間消曬成個CHAIN，唔洗等。

——開技關鍵時刻

每隻公仔都有技能，不同的技能都有最佳的開技時間，絕大多數的公仔的技能都係衝分（除了一隻貴婦狗叫Lady ，聲稱可以加錢，但廢到無倫，你用過黑魔后就知咩叫多錢），在進入FEVER TIME 後開技就最好。

有無例外？梗係有。就係個技能本身係消除系，例如小飛象Dumbo、米奇老鼠、巴斯光年、Frozen 條出走八婆Elsa 之類，如果儲滿技能，畫面又已經有好多與主角相同的公仔，又無乜BUBBLE，咁就可以開技，務求進入FEVER TIME，睇下可否用畫面內的公仔，衝多一次技，在同一個FEVER 內開多次。

而黑魔后都係例外，因為佢個技能一開，消第一下已經會好容易入FEVER。

另外，每隻角色的技能錶滿額程度不同，例如Dale 係12隻就滿，黑魔后Maleficent 呢，就要23（全遊戲最高，好似係）！呢個實際數字唔重要，最重要係，你要心目中大概知道連了多少主角公仔後會滿技，在消除類角色尤其重要。

因為當連上長CHAIN，而超過滿技所需的公仔而不開技，就會把公仔浪費了，故此當看到技能錶快滿而「不幸」（其實好幸唷）連上長CHAIN，就要在技能錶滿一刻開技，餘下的公仔就可以計入下一次儲技中，不用浪費。（齋講真係廢UP，自己試下）

老手心得

專尚盒的公仔各有技能，但好用既唔係太多。抽中廢野（例如《小鹿斑比》三隻野、長髮姑娘同埋佢隻變色龍，真係廢到無倫），除了唔好諗繼續玩之外，你係無野可以做到的；而且，話就話呢D 公仔的技能好用，但係技能LV 未夠的話，仍然好極有限，衝分數的能力一定比唔上LV3的Dale，故此，剛剛開始抽專尚盒的玩家們，通常大家都需要仍然KEEP 住用Dale 的。

我呢度先介紹我覺得好用的公仔：

——Let’s eat 糕～ 《Frozen》 的Elsa

呢條八婆呢，佢個技能勝在可以唔用腦：將底部的公仔冰封，再按一下就全部粉碎（全部計一個CHAIN）！

唯一要注意既係，由於佢個技能係一D 都唔離地，所以每次開技都要留意公仔是否穩穩陣陣咁係個底到，同埋範圍內唔好有太多BUBBLE，否則就變了射空炮，好慘豬的。

由於我自己用Dale 用得好熟，故此在Elsa LV4之前我都唔太喜歡用。純粹係呢度介紹下而已：）

——《怪獸公司》隻藍色毛毛

呢隻野就巴閉，可以變出大毛毛公仔，一隻大等於5隻小唷！厲害之處在於，由於佢變出來的公仔係毛毛，消除之後可以隨即累計儲技（唔似得Dale 變佢個老友出來，儲唔到！），故此當呢隻藍怪獸技能夠高（我暫時Lv3），係好容易招駁招咁不斷開技，而且大公仔的連結判定範圍大，好容易就連到遠少少的公仔，好爽的。

順帶一提，佢個技能出招時，除了像其他公仔一樣短暫停止時間彈個死人頭出來之外，D 公仔脹大個陣仲額外暫停時間少少，玩家在這千鈞一髮的瞬間就可以判斷點連，爽上加爽。

——我的最愛：黑魔后Maleficent

問答無用，黑魔后係全隻GAME 最神奇頂級超卓，任你點演繹都係咁無敵，就算係LV1技能，都可以輕易過百萬分。

但係呢隻公仔屬於高手向（well~ 係直線讚自己的，做總編就可以連呢D 文呢句都出），基本上一開技，就餘下數秒讓你衝分，詳情唔多講，自己睇片：）

（LV4 的黑魔后，所有野全開，係可以衝六百萬！係六。百。萬。）

（仲有怪誕城阿JACK都唔錯，同樣係LV1已經可以過百萬，不過我少用，無咩心得）

——用唔用＋COIN 寶物好呢？

外國網站有人做過紀錄，計算過如果平均每場都有＄1,351呢，你就用啦下。