幾日前暴雪出品嘅《 Overwatch 》beta 就完結咗，我地幾個VJ gamer都一致好評(好似有一個唔like)，你可能會第一時間問 2K隻《 Batteleborn 》好玩d定《 Overwatch 》好玩d，我會答你冇得比較，因為根本兩隻唔同類型嘅game，如果真係要講，《 Batteleborn 》係第一身嘅 Dota game，《 Overwatch 》係偏向FPS game。

人設畫風方面，好重迪士尼 Pixar 感覺，動畫tone又唔會太細路，有d英雄仲幾型。係今次 beta 包含嘅地圖都幾多，以唔同國家黎區分，每個地圖都有各國家嘅特色，而每張地圖都有獨特嘅佈局同制勝條件。對小編有好深印象係日本個map，預備開始嘅地方係機鋪，見到好多二次創作嘅 game，例如 《 Metal Slug 》變咗《 Super Siege Mode 3 》，識笑其實好好笑。

暴雪當然唔會放過係《 Overwatch 》sell埋旗下其他 game嘅機會， 係美國個 map 就會見到其中一部電腦係玩緊《 Hearthstone 》，暴雪你係得嘅!

遊戲以 6 vs 6 黎進行，模式有佔領、護送、控制及 佔領加護送，有玩過 《 Team Fortress 2 》你都大概知點玩，係呢度唔多作介紹。值得一提當遊戲進度差唔多完結嘅時候，如果雙方勢均力敵，就會出現 overtime 情況，而 overtime 長短會依據弱勢果 team 可以反敗為勝嘅情度已加長或縮短，令到成隻 game 更加緊揍。

英雄方面，就分咗攻擊、防禦、肉盾同輔助，每隻英雄都有唔同技能，當中包括一招大技，呢招大技往往可以扭轉戰局挑或隻消滅對方一整隊，而有d 英雄可以二段跳或攀上高處，有d可以短暫飛行，各有優劣，而且強弱設定都好平均，所以隻 game 好重 team work 性，玩家要依據唔同地圖嘅制勝條件而選擇英雄，例如打佔領做守方，可能就要偏重選擇防禦或肉盾英雄。

一 team 中可以選擇相同嘅英雄，可跟據自己 team 嘅風格有特定嘅陣形，例如四個炮台兩個補血咁，係遊戲中途可以隨時轉換英雄，咁設定就可以令到玩家要依戰鬥局勢而變陣，隨時因為咁而反敗為勝。至於唔同英雄嘅心得我地遲下會逐隻講下。

操控手感方面冇一般 FPS game 咁需要描準得好叻 ( 狙擊手除外），多數靠技能殺人，門欖唔高，只要熟英雄 d 技能點用就 ok ，用熟咗仲有機會一次過殺對方成隊，爽快感重。
作為一隻電競向遊戲，《 Overwatch 》會係你每場遊戲自動記錄你嘅精彩時刻，你可以隨時重溫精彩重播，而每場遊戲完結，每位玩家可以票選最強玩家，增強電競比賽可觀性。


整體黎睇《 Overwatch 》感覺同設定好似當年嘅《 Team Fortress 2 》，門欖又唔算高，玩法又唔太重覆，因為對住唔同team嘅陣形又要唔同嘅應對打法，加上係電競向遊戲，好鬼易中毒日日煲，有一大班朋友玩簡值一流，呢隻 game 值得一試 。