鬥陣特攻近期開放公測，眾所周知。資源所限，攻略匱乏。各玩家都糊裡糊塗，每場遊戲都胡混過關。好彩就靠自己眼界準，殺人殺得快夾狠，搭救少少識玩的隊友，符碌咁贏。行衰運就只能望天打卦，送命等輸，極速完場。

其實鬥陣特攻不外乎一個遊戲機制，就係「走位」。正所謂走位走得好，唔會死得早。由魔獸世界副本、戰場或者競技場，乃至Overwatch都強調走位。推車要睇位，佔領要睇位，連戰場左中右路都要睇位。死人係冇傷害㗎，所以睇走位，唔好死。

今篇文章只講推車，所以其他按下不表。推車，乃指「護送目標前進」。故名思義，即係走近嗰部車，從而令車逐步前往終點。

換句話講，你走到母雷公咁遠係推唔到嗰部車，唔可能贏㗎。更何況你唔係狙擊手奪命女，根本唔需要左閃右避，避反殺。出得嚟玩，就唔該行前少少，唔好再係橋上邊，天台上面哂子彈。尤其係揸左輪、散彈槍、電擊棒嗰幾隻英雄，唔好當係狙擊槍咁射人，人地收唔到你份好禮㗎。

單單殺敵求人頭，係唔能夠幫你贏到呢場遊戲。鬥陣特攻重戰略技巧，除咗要你熟悉某幾個英雄技能之外，仲要以戰略取勝。推車不外乎行過去車前面射人，跳上架車度射人，或者摱車邊射人。話之你係托比昂個老漢起架炮塔係車上面，只要你個英雄黐住架車，就可以推車。

你可能有所不知。不論攻擊方或者防守方都可以推車，係前面推返轉頭又得，從後面推上去又得。只要你有抦武器係手，就可以推車。唔好以為淨係得攻擊方可以進攻先得，都要理解防守機制，先至可以制衡敵陣。

推車基本玩法係攻擊方護送架車去終點。順利的話攻擊方就可以一路推車，一路殺人。就好似扯大纜咁，當雙方都差唔多人數係度一齊推車，部車就會唔郁。但係同時攻擊方人多黐住架車，架車就會開始推前。而防守方係要令到攻擊方掂唔到架車一排，先至可以真正將架車推番轉頭。防守方勁嘅話絕對係可以推車推番去起點。上高條進度條會寫明家下有幾多攻擊方推得到架車，圓圈入面係代表人數。人數愈多，防守方只能夠殺人或者愈多人鬥頂着架車。

跟着一樣就係檢查點。推車戰個檢查點係最明顯，最容易理解。一旦架車到達檢查點，賽事時限即刻加長，檢查點前面道閘都會長開，而且雙方重生點都會轉去新地方。真係陰公，玩辛梅塔嘅留意番要開返另一個傳送門出黎，咁新重生點先會有傳送門用。事關攻擊方個重生點會變近咗個檢查點，咁樣架車其實就比較難推翻轉頭去返檢查點之前嘅。

檢查點之間係有路軌，架車淨係跟路軌行。而檢查點通常都會有個大圓形平台，或者橙色士巴拿圖案係地面。唔係堡壘機兵嗰個橙色圖案，嗰個係佢身上出現㗎咋。地圖入面搵唔到都唔洗驚。介面正上方都有個進度條，嗰幾個上箭嘴就係檢查點，白色係未啟動嘅，紅色就自然係啟動咗嘅。見到條紅色條就到白色箭咀仲唔落力啲，加多兩錢肉緊，就抵你輸啦。

如果就輸嗰邊覺得時間唔夠，仲未夠喉，係可以加鐘。加幾多就睇嗰邊有幾能耐。持久力強，絕對可以再戰三百分鐘架。一旦出現加時賽，介面上高就會有條火線，條火線燒完就直接判輸贏。至於點樣鬥持久玩拉鋸呢，就係就輸嗰邊要不斷搵人阻止另一邊贏，等條火線唔好燒落去。

推車嚟講就係鬥推車，企人係車附近，再直接啲係殺清光頂着架車嘅人。只要一刻有人頂住唔放唔繳械，就可以不斷加鐘。有試過法拉係呢個關鍵時間，得小貓一兩隻頂住，仲要跳到半空開大絕火箭炮，真係絕無僅有戇居。記得唔好掛住推車殺人，就唔記得跟住架車行，係會直接輸㗎。

我成日打親有推車嘅地圖，總有啲豬隊友係隊入面，好在一個係唔足以拖累全隊。只要有三個隊友識玩，咁就未洗太快輸。推車黎講，三個人最抵玩。太多人只不過於事無補，唔會推得再快啲㗎。你諗諗三個人一齊推車，其實係極限黎㗎喇。咁樣計法，一隊人就可以分配三個人推車，三個人睇水殺人，幾寫意呢。

最後講埋啲小貼士，部車係絕對防彈防爆。唔好以為係隔離隻射擊遊戲，放炸彈可以炸爆架車。換句話講，你可以一邊避彈，一邊推車。不過有個炸彈係隔離就唔該醒水，成碌木企係度，架車唔爆你都死啦。仲有部車曉補你血㗎，係就補得慢過啲輔助英雄，聊勝於無。如果你唔覺意被人射左一兩下，只要推車就可以慢慢補返你啲血，幾爽皮啊。

趁鬥陣特攻公測完咗就留意多啲官網消息，多啲了解隻遊戲點玩啦。如果唔係點同人比賽競技呢，累到人輸咗仲唔知醜，就下次唔該學精啲啦。