大家都知道鄰近科技大國除咗有「自主研發」既高達之外，又有「自主研發」既電話架啦，而家連「自主研發」既家用遊戲機都有啦，係 5月10日，大陸深圳既斧子科技，就舉辦咗充滿住原創味道既發表會 (喂一睇個台就知道幾咁有特色啦！) ，宣布將推出以 Android 系統為基礎、針對大陸市場既遊戲主機「戰斧 F1」，主機將會有2個版本，暢玩版同菁英版，價格就係人仔 899 同 1499 ，預定 6 月 1 日起陸續出貨。

連啲顏色配搭都熟口熟面，微軟真係無恥搭時光機去抄人

咁大家一睇幅圖就知道鄰近科技大國係幾咁先進，連 Sony同 Microsoft都要坐時光機去抄呢部「戰斧 F1」既外型同手制，認真巴閉！而發布會上面，斧子科技 CEO 王峰就話已經有超過 200 家廠商合作咁話，其中有 KOEI TECMO Games、Arc System Works、Ubisoft 同埋 Deep Silver 等等國際知名遊戲開發商，獨立遊戲工作室就有 Rimlight、Comcept 等等，佢地首波推出既勁新作品就會有包括《真‧三國無雙 7 猛將傳》在內既 20 款遊戲，之後仲會有《Assassin’s Creed Chronicles》、《BLAZBLUE CHRONOPHANTASMA EXTEND》、《Saints Row 4》、《Mighty No.9》等等勁新既大作囉，一睇個遊戲表我仲以為自己活在2015年添阿陰功，希望佢地後繼遊戲表會有埋《魂斗羅》、《雙截龍》呢啲 Game啦。另外發布會上面，《Mighty No.9》製作人「稻船敬二」竟然幫佢站台……咁我試過隻《Mighty No.9》就真係唔係幾掂，唔通「稻船敬二」都知自己瀨野所以幫佢站埋台諗住賣多幾隻？

UI充分顯示出獨特既個性，連Sony PS4都要抄佢

Spec方面，戰斧 F1 採用 NVIDIA Tegra K1 CPU，配 4GB DDR3 記憶體同埋 32GB eMMC 快閃記憶體，菁英版就另外配有 500GB 2.5 吋 HDD硬碟機。具備雙頻 802.11a/b/g/n MIMO 無線網路、RJ45 有線網路、藍牙 4.0 連線，USB 3.0 連接端子同 HDMI 1.4b 影音輸出端子 (唔知拆開會唔會係小米盒子黎呢)。另外呢部野都會有埋 VR既，價錢就 1100 人仔，平就幾平既，不過大家都知道中國製的會爆炸…….帶係個頭度既野，你懂的。