彈幕Game Fans福音，之前係 Xbox 360、Xbox One 同 iOS 上面推出過既《怒首領蜂 大復活》，即將會係 PC 上面發行，預計秋季於 Steam 上架。
被譽為彈幕STG始祖既《怒首領蜂》，係2003年推出了《怒首領蜂 大往生》呢款作品，但係之後幾年都無再推出系列新作，當時好多玩家都以為怒首領蜂系列 GG，直到2008年推出今次 PC登場既作品《怒首領蜂 大復活》，大家先知道原來廠商並無放棄呢個系列。
今集標題叫做《怒首領蜂 大復活》係有段古既，因為係地球人都知道《怒首領蜂》系列難到痴線，所以開發廠商 CAVE 亦都明白到之前作品難度過高，難以吸引新客，於是就「大往生之後大復活」，開始咗今集《怒首領蜂 大復活》，以低難度既初心者路線為賣點所開發出黎既作品。
今集為咗吸引新玩家，難度方面比起大往生大幅降低，起碼敵方攻勢明顯無咁猛烈 (但係都係好難……)，另外亦都加咗個特別系統去迎合初心者，其中一個就係自動Bomb系統，當受到攻擊時，就會由系統自行使用Bomb，可以逃離一死。而令一個主要系統就係「Hyper Counter」，當自機攻擊敵人果陣會累積「Hyper Counter Gauge」能量表，當儲滿果陣就可以發動「Hyper Counter」，效果就係係一定時間內，大幅強化自機火力，並且射擊時會帶有消彈性能，可以將敵方既子彈消去。但係同時呢個系統亦有缺點，當「Hyper Counter」發動時，敵人既攻擊亦會激烈化，令到自機迴避難度提高，而隨著發動次數累積，消彈性能亦都會減弱，所以係要有策略地用「Hyper Counter」。
圖為Xbox 360版本
遊戲資訊
遊戲名稱：怒首領蜂 大復活
發售日期：秋季預定
遊戲類型：STG 射擊
遊戲平台：PC (Steam)
遊戲售價：待定
VJGamer總編，細細個已經蒲機舖，機齡甚深，熱愛電玩文化。