早排出左《數碼暴龍tri》第1﹑2章，勾起左我好多童年回憶，諗起以前小學同同學日日傾數碼暴龍，日日放學番屋企即刻開電視睇數碼暴龍。過幾星期前仲出左隻《Digimon Linkz》嘅手機遊戲，雖然降臨嘅難度爆哂燈，大部份玩家都表示不滿，但我相信大家都好似我咁成個腦都係數碼暴龍。正當數碼暴龍熱潮再次被帶起之際，傳黎一個傷透被選中嘅細路嘅消息——《數碼暴龍01》主題曲《Butter-Fly》嘅主唱和田光司癌症病逝。

1999年憑住演唱《Butter-Fly》出道，展開左佢嘅數碼之旅。天意弄人，2003年被診斷患上咽喉癌，宣佈退出治療期間更一度失聲。2005年養病中復出，2011年發現癌症復發，再度退出。2013年第二度宣布復出，並於2015為《數碼暴龍tri》演唱《Butter-Fly Tri.》。和田光司包辦左數碼暴龍01到04代嘅主題曲，此後亦都一直參與《數碼暴龍》嘅歌曲演唱。對數碼世界嘅貢獻加上兩度復出，被譽為「不死蝶的動畫歌手」。

抗癌13年，相信數碼暴龍對於佢係一股龐大嘅動力。然而，和田光司奮力抗癌所換黎嘅並非單單一個系列嘅電視動畫，而係日本﹑香港，甚至世界各地嘅80﹑90﹑00後嘅童年。要知道，一個健康正常嘅歌手要keep住16年主唱一套電視動畫足足咁多代嘅主題曲已經係一件好難嘅事，何況係早早患癌嘅和田光司。

每個抗癌勇士都有自己嘅故事，都有自己想守護嘅野，從而得到力量。一位被選中嘅抗癌勇士，締造出數以唔知點計個被選中嘅細路。

多得你，我地嘅童年充滿熱血，充滿力量。多謝你，和田光司:’)