第一篇想講下，有隻啲bug多過乜嘅game，叫《小宇宙幻想傳》。

其實大家睇開聖鬥士星矢，都知小宇宙無乜幻想，就係去到第八感就完。五小強必勝唔在講，最接近神嘅男人唔係沙加，而係星矢，無論你有幾高小宇宙，佢都可以KO你。

當我滿懷理想用「性暗示星矢」呢個咁霸氣嘅名打算橫掃江湖，卻發現原來隻Game第一隻要放棄嘅角色，就係星矢—星矢肉唔厚，彗星拳無力；然後第二個要放棄嘅角色，叫阿瞬，招吸HP大絕勁難出         ，缺乏應有攻擊力之下，五小強廢掉兩強。隻Game，完全顛覆咗大家對星矢嘅定義。

呢隻Game平衡度超爛，通街金牛、黑馬，好用組合毫無驚喜。金牛企前排開盾擋招，黑馬有降防、中毒，加埋隻山羊座掛個金牛盾衝入敵陣放手刀，真係唔講得笑﹗不過一見到人人都係呢個組合，你就唔會再笑得出。

目前最勁嘅，一定係黑馬、巨蟹、金牛、蛇夫、一輝、英仙，最廢或者最唔知想點嘅，係處女、水瓶、神獅子、魔鈴、紫龍等等，大家留意。

最可悲嘅係，偉大嘅台灣Server同我哋講，其實隻game叫《宇宙bug幻想傳》，公會突襲戰bug、顯示bug、頻道bug、聖石bug，應有盡有；有公會成員，人人都chok到有五星成長度金牛、五星黑馬（所以公會戰關閉至今，公會名存實忙）；點解仲要繼續玩？我估係因為，大家都曾經係雅典娜嘅聖鬥士，大家都曾經係一個大聖域膠，會為遊戲入面嘅五粒星成長度而戰 ﹗

可惜，如果要五粒星，你就要課金。你唔課金，你永遠得三粒星，要忍受人搶你排名同資源。隻game入面雅典娜出場最多嘅畫面，就係要你課金。靠女神來叫你課金是可恥的，但偏偏fans好受落，作為一個自細都J過雅典娜嘅人（有人話J穆先生先正），都課咗金，求雅典娜俾聖石，用來轉蛋、轉錢，升角色；我敢話，台灣Server（有三個）以聖鬥士全能力排行計，頭30到40位嘅師兄（包括小弟），都係最接近課金之神雅典娜嘅男人，明知有bug都繼續玩，個個課五位數港紙，無非為咗，聖鬥士雙手劃開，出征嘅一幕。

不過課金都抵嘅，隻穆先生，的確露出咗白羊獠牙，一招星光滅絕收人皮（不過如果對面嗰隻係一輝，一輝復活緊嘅時候，白羊會對住條屍出招，又係bug），其實幾爽YY，亦可見現實就係有錢就有小宇宙，「燃燒吧﹗我的荷包﹗」

話說隻game乜都要用錢，偏偏又得一個叫「玩家十二宮」嘅副本可以打錢；「玩家十二宮」，防守角色取決於玩家喺另一個競技場派咩人防守，理論上只要全世界都派廢人，人人自然打得到最後一宮，但就要用另一邊嘅獎勵來做取捨。於是唔少玩家，直頭喺公開頻道，倡議「放防」（派廢人），希望可以齊齊搵錢，但又有人出聲教訓啲「廢青」，話你自己唔課金唔上進唔勁，唔通要人讓你？

講真，識玩嘅人，真係好少理，一於用時間差，夜晚拎完競技場獎勵就放防，等人打到你排名落後，第二朝玩「玩家十二宮」後，再派番勁人防守，每日搶番排名等收工，好似循環咁，到有一日你突然發覺，玩bug已經係你唯一驚喜嘅時候，先至會放棄吧？