等到＿都長既Dead or Alive Xtreme 3終於推出啦，我地VjGamer特別將佢命名中文名為《咸濕排球3》。對上2集都只係出係Xbox真係實在令Playstation既玩家葡萄到核爆！好在今次終於係 PS4/PS Vita上面推出，再加上今次仲有埋獨家研發既『柔膚引擎』，完美地呈現出一班靚女既白滑肌膚 (嗚丫！)，而遊戲內主要分為早、午，黃昏，夜晚四個時段，頭三個時段可以進行各種遊戲又或者用島主模式去偷窺拍攝一眾女女既美態。而到夜晚就會返到酒店係床上面……休息(咪心邪)，又或者可以去賭場玩返兩手咁，好啦廢話唔多講，立即為大家介紹下有乜玩！

挑戰攀岩

基本上即係攀石 (呢班女女果然個個都係格鬥家…空手赤腳咁攀石)，只可以自己一個人玩，當遊戲完成爬去到頂之後就可以見到女女流出黎一滴滴既甘露汗水。完成可提高滿足度

沙灘搶旗

可以選擇對手，鬥快跑去搶插係沙上面既旗仔。完成後2人既滿足度會稍微上升

頂屁屁遊戲 (嗚呀)

可以選擇對手，2人同時企係同一個浮台上面，目的係撞對方落泳池。完成後自己同對手既友好度皆會上升

泳池跳方塊

可以選擇對手，2人鬥快跳過浮係水上面既方塊，最快到達終點者贏。完成後自己同對手既友好度、滿足度皆會上升

拔河

咪即係拔河囉，可以選擇對手，2人各自企係自己既浮台上面，目的係拉對手落泳池。完成後可獲得大量報酬

沙灘排球

本作重點！可以選擇對手，必需有拍檔先玩得，2對2，先拎7分者勝。完成後4人都會提升滿足度，勝方會得到最多獎勵！

賭場遊戲

21點

即傳統21點，只要贏到莊就贏，注意遊戲裡面既啤牌係同特別版實體果套係一樣既，想睇實體版既可以點呢度 《DOA 3》PS4 典藏版 開箱！！

話事啤

即傳統話事啤，賭神玩果種，玩心理遊戲，但要小心老襯底比對方識穿時會報以一句：想偷我雞？

輪盤

最好賺錢既遊戲，即係買點數或者買冧把

評語：

老實講今集小遊戲真係比較少，略嫌有點搵笨，但係呢種係要黎『用』既 Game，有得同成班咁青春既女女一齊同陽光玩遊戲，你仲嫌乜丫！