假如大家係一位忠實嘅鋼鍊迷，一定對於原著入面七個人造人嘅死亡唔陌生，人造人嘅出現源自「父親大人」嘅七種情感：色慾、貪婪、怠惰、饕餮、嫉妒、憤怒、傲慢，而「父親大人」之所以會製造出七個來自佢情慾嘅人造人係因為佢覺得，只有脫離呢七種情感，佢先可以更加超脫嘅存在。

其實荒川弘安排七個人造人嘅死法，個人覺得係有用意的，首先，代表嫉妒既安比係喺傷疤人，大佐，愛德華同中尉面前自殺而死，臨死前愛德華同佢講：「其實，安比你係羨慕人類嘅團結同堅強吧？」 正正因為佢真係咁，所以即使其實佢好需要愛德華幫佢，但都寧願自殺，因為佢唔希望被人睇穿佢心底嘅妒忌，其實相應之下只不過係心底入面嘅羨慕同寂寞，而佢亦係唯一一個自殺嘅人造人。

而代表貪婪既格利特，喺變節之下，藉由自己嘅能力希望阻止父親大人將成個地球既人變成賢者之石，最後俾父親大人強行殺死，臨死前佢雖然唔願意承認，但得到靈魂牽絆嘅朋友，繼而願意自我犧牲， 某程度係因為佢已經得到想要既友情，佢所講嘅「冇野想要了」，正正就係得到貪婪所對應嘅滿足。
代表憤怒既大總統係喺同傷疤人正式對戰下戰死，但呢個死法係同拉利絲,肥仔係唔同的，仲記唔記得佢講過，就算佢係陪住老婆同個仔，佢嘅心情都係無時無刻地感到憤怒，而唯有係對戰時先令佢得到快感，而正正因為佢每次同人對戰都係佢情感嘅釋放，所以對於佢嚟講，戰死都係一種光榮，加上佢本身就係由士兵改造成人造人嘅源故，本來就對於對戰以及勝利有一種追求，無法昇華自己，都會令佢憤怒，種種之下，能夠隨意釋放自己情感嘅最後一場對戰對佢嚟講都係一種快樂，而其實，相應之下，憤怒就係需要釋放以換來快樂。

*另外，安排傷疤人斯卡同佢對戰亦係必然嘅設定，身為伊修巴爾人嘅佢，一直以來都受大總統嘅政權壓榨，差唔多滅族嘅佢，當知道殺死伊修巴爾人其實就係為咗製造賢者之石，佢地兩個，正正就係長期受壓嘅弱勢與極權政府抗戰嘅縮影。

傲慢果個小朋友人造人最後冇死到仲變返一個BB， 冇死到嘅原因，係因為為傲慢嘅強大，相對嘅只不過係想掩飾自己嘅弱小，亦因為咁，所以佢嘅能力係利用「影」呢樣野去攻擊， 似係強大，但一直活在黑暗之下嘅佢，其實最易破解。而係最後得到愛德華嘅明白同體諒，冇殺到佢嘅本體，亦係因為咁令佢可以重新開始。 而其實呢啲所謂嘅罪，只不過係由感情而產生，係一種寂寞同弱點，就連代表懶惰嘅大隻仔，你話佢其實係咪唔夠阿姆斯唐少校打？未必，不過佢最後嘅死，有好大部份係源於自己根本唔想煩，連死之前佢都話「好麻煩」，呢一種因為懶惰而最終招至自滅嘅死亡其實都係有因有果，而呢五種原罪，其實都只係一種情感嘅產生。