以北歐神話做背景嘅遊戲總係好吸引到我，今年就有殺到去北歐嘅《戰神：諸神黃昏》（God of War: Ragnarök），下年都有呢款恐怖冒險遊戲 《Bramble: The Mountain King》，扮演一位小男孩孤身勇闖森林，林中一眾魔物對佢虎視眈眈，淨係題材已經好正！

《Bramble: The Mountain King》由 Dimfrost Studio 開發，係一款生存恐怖冒險遊戲，採用第三身視點。玩家將扮演奧列，為咗拯救被恐怖巨魔綁架嘅姊姊而踏上旅途，喺路上會進入充滿大小不同事物嘅奇異土地，當中包括有眾多飢渴野獸潛伏嘅森林與洞穴，把握進退時機為救出姊姊而努力。

遊戲主要玩法係潛入躲藏與解謎，亦有少部份戰鬥。透過附魔碎片「勇氣星火」可幫你以獨特嘅方式擊敗恐怖生物，並幫助你通過陷阱與試煉。不過根據官方描述，碎片似乎不能過度使用，會令你遠離善良步入黑暗，即係黑化。

《Bramble: The Mountain King》預計於 2023 年推出，對應平台為 Xbox One、PS4 及 PC Steam，現時 Steam 商店頁面有免費試玩 Demo 開放下載。