又到咗一年一度最多恐怖 Game 嘅日子萬聖節啦！每年呢個時候都有大大小小嘅恐怖 Game 推出，未諗到要玩邊隻的話，不妨考慮下今次介紹嘅作品《Evil Nun: The Broken Mask》。玩家要孤身一人面對瘋狂嘅邪惡修女，到底你有無辦法逃出生天呢？

《Evil Nun: The Broken Mask》由 Keplerians 開發，係一款恐怖冒險生存解謎遊戲，採用第一身視點。故事講述玩家被邀請參加一個宗教夏令營，去到之後的確係有修女等緊你，不過係瘋狂邪惡版本同時手執巨錘。佢會不停地追殺你，而你可以做嘅就只有逃跑匿藏、啟動機關拖延或者周圍吐香口膠整到修女鞋底痴立立……。

遊戲目標好簡單，就係逃過修女追殺離開呢間廢棄學校，過程中你要解開唔同謎題去打開道路以及啟動機關協助你拖延修女行動，並且會發現其他被困嘅人士，同時修女會不停尋找你嘅足跡，AI 會根據你嘅行動而將搜索範圍不停擴大，非常刺激。

本作係以手遊《Evil Nun Rush》強化而成嘅 PC 版本，加入重新設計嘅新謎題、場景，圖像亦有所強化，與手遊版本不能相提並論。即將推出嘅版本會提供第一個章節供免費遊玩，但如果想玩到後續嘅內容就要付費。完整版本將會有六個章節，預計會於 11 月 1 日推出搶先體驗，對應平台為 PC Steam。