好多時獨立遊戲都有唔錯嘅作品出現，最主要原因係製作者背後無受到公司高層指指點點，自己想點玩就點玩。今次介紹嘅作品《奇怪的RPG》就發揮想像力，有類似《Hades》嘅玩法，但就加入奇怪嘅武裝，當中就有一把武器會因應你顯示卡有幾廢去決定有幾多 Buff，非常有趣。

《奇怪的RPG》（Weird RPG）由獨立製作人 yuzhen 製作，係一款動作角色扮演遊戲。玩家將穿梭於各個世界冒險探索，面對各種怪物完成挑戰。操作上類似《Hades》，都係以各種武裝及技能殺敵，依靠「翻滾」閃避及走位，當然 Boss 戰同樣要睇清楚攻擊模式再搵位反擊，特別係製作者表明係高難度，換血絕對唔係聰明嘅打法。

作為本作最大嘅賣點，自然係大量奇怪嘅裝備。有上述顯示卡越廢就越多 Buff 嘅雙劍、有可儲存聲音力量嘅武器（要開咪）、有致敬《Dota》名事件「ZSMJ 之七分鐘」嘅聖劍等等，每種創意武器都有完全不同嘅特殊效果，逐樣試真係幾過癮！

《奇怪的RPG》已於 PC Steam 推出，評價為「極度好評」，並只售 HKD $58.00，抵玩非常。