FromSoftware 出品必屬佳品，除咗大熱作《Elden Ring》之外，過往嘅魂系作品《Dark Souls》、《隻狼》等等都係公認高質作品。FromSoftware 除咗做魂系作品出色，仲有非常出名嘅機甲動作遊戲系列《Armored Core》，可惜等咗超過十年都未有新作，直到早前傳出新作開發中傳聞。近日，喺 FromSoftware 嘅招聘頁，就出現一個職位，需求事項與《Armored Core》系列極之吻合，似乎印證咗新作開發中傳聞！

有 Reddit 嘅網友發現，FromSoftware 正招聘「2D 角色設計」職位，工作內容係負責角色及機甲相關嘅各種設計，當中更包括武器及裝備等相關道具，並且需要深入了解遊戲概念並以圖像去表達相關嘅設計，希望有擅長機械設計嘅人材加入團隊。

考慮到 FromSoftware 歷年嘅作品，絕大多數都係圍繞住魔法、冷兵器戰鬥，就算係《血源詛咒》有大量機械相關裝備，但同「機甲」呢樣野完全扯唔上關係，唯一有關嘅真係得《Armored Core》系列。今次嘅職位招聘直接令人聯想到新作正在開發或企劃中，考慮到今年年頭流出疑似係新作嘅圖片以及問卷（相關文章），睇落又唔似係早期開發階段，即係話如果跟傳言《Armored Core VI》會喺 2023 年頭推出的話，今次隨時可能係為另一新作「機甲」做準備！

完稿時仍未收到廠方回覆，即係大家都仲係得個「估」字。根據過往紀錄，如果真係有新作推出的話，最快喺今年年尾 TGA 2022 頒獎典禮就會見到新片，因為過去《Sekiro》以及《Elden Ring》都係喺頒獎典禮上獨家發表首條影片，相信今次都唔例外，反正都係等多 2 個月左右就知啦！