帶埋部單車 Hea 住咁周遊列國咁去體驗唔同地方文化，相信係唔少人嘅夢想，不過你估想去就去到咩，大家都有要顧慮嘅事物。新作《Season: A letter to the future》就係描述一位女子，帶埋佢部單車，孤身上路去體驗及紀錄沿路所見所聞，有時遠離打打殺殺玩下呢類洗滌心靈嘅作品都唔錯。

《Season: A letter to the future》由獨立工作室 Scavengers Studio 開發，係一款敘事型冒險遊戲，採用第三身視點。玩家將扮演主角 Estelle，一位獨自離開家鄉嘅女子，踩單車探索世界。以佢袋中嘅相機及錄音機，喺任何佢喜歡嘅地方拍攝藝術作品，並錄低聽到嘅聲音及音樂，又或者以文字、繪畫去紀錄所見所聞。

旅途中，你會遇到各式各樣嘅人，聆聽佢哋之間嘅故事，創造心靈交流嘅時刻，同時更會得到重要嘅訊息，例如係過去經歷過咩，未來會有咩災難，更會因應遇到嘅 NPC 改變故事嘅發展。另外，本作入面並無四季變化，相應嘅係每個季節代表一個時代，每季結束時世界都會被神祕嘅災難摧毀，所以主角以文字、相片、錄音、繪畫所紀錄嘅點點滴滴別具意義，最終會收錄至日記中，成為給予未來嘅一封信。

《Season: A letter to the future》預計於 2023 年初推出，對應平台為 PS5、PS4、PC Steam / Epic Games Store。現時喺 Steam 上有提供免費試玩版，可遊玩前三章內容，當中包括學習使用相機、錄音機以及踩單車探索。