早前推出宣傳片，預計下年全平台推出嘅 2.5D 動作遊戲《Mandragora》質素非常唔錯，畫面精美之餘仲加入惡魔城、魂系等元素，都幾吸引下。雖然要等到下年先有得玩，但而家已經可以喺 Kickstarter 度買定先！

《Mandragora》由匈牙利工作室 Primal Game Studio 開發，係一款 2.5D 動作角色扮演遊戲，但加入惡魔城及魂系元素。故事發生喺一個已被怪物侵佔嘅世界，人類只能活於磚牆及柵欄後面（好巨人嘅設定），為咗人們嘅自由與歡樂，身為戰士嘅主角就肩負重任出發奪回世界希望。

遊戲一開始要先揀選職業，暫時有近戰 Vanguard、法師 Spellbinder、藥師 Larcenist、火法 Heretic 以及眾籌成功後先會出現嘅德魯依 Warden。每個職業除咗技能、戰鬥方式不同，就連核心玩法都會有分別。戰鬥類似一般平面動作遊戲，但係就加入魂系翻滾、盾反等動作，更有強大嘅魔法技能組合，例如可用黑洞「吸」住啲怪，再用大範圍魔法炸佢地，玩法都幾自由。

喺戰鬥過程中擊殺敵人會掉落精華，可以用來升級角色解鎖新技、被動天賦，或者升級女巫燈籠（即係額外天賦樹），不過一旦死亡，身上嘅精華會全數掉落。另外，遊戲中有大量不同類型武器使用，配合各種技能及職業就會有超多類型玩法。至於敵人亦都有好多唔同類型，有最廢嘅殭屍、食屍鬼，到具有更複雜動作嘅看守者、吸血鬼等等，每個敵人都將擁有一套特定嘅進攻及防禦機制，絕對唔係亂斬果類無雙 Game，反而係要小心唔好貪刀嘅類型。根據資料，遊戲中將會有多達 60 多種敵人、10 隻主要 Boss 及 5 隻迷你 Boss。

除咗遊戲本篇故事，透過女巫燈籠將可前往異世界挑戰副本， 升級巫燈更會解鎖更多地區。同時各地區都會有多條路徑以及秘密嘅分支地圖供玩家發現，學習新技能後可摧毀牆壁、地板開闢新路徑或秘密區域，或以新嘅特殊動作技能去到達新領域，類似惡魔城嘅概念，即係同一個地方因應學到嘅技能可去到唔同地區，大家應該唔會陌生。

《Mandragora》預計於 2023 年推出，對應平台為 Xbox Series X|S、PS5、Nintendo Switch 及 PC Steam，現時已於 Kickstarter 眾籌中，有興趣嘅可以去支持買定先。