早前曾推出 Demo 試玩嘅動作角色扮演新作《Soulstice》，由於擁有吸引嘅畫面、《Devil May Cry》般爽快戰鬥兼孖妹共存嘅設定，成功吸引一眾玩家注意。日前本作正式推出，兩大家用機陣型同 PC 都有得玩，正！

《Soulstice》由 Reply Game Studios 開發，係一款黑暗動作角色扮演遊戲，採用第三身視點。故事講述神聖王國「Keidas」被一種外來怪物「Wraiths」入侵，而且佢地會佔據人類嘅身體，並將之變成會捕食人類嘅怪物，要消滅呢種怪物只有靠稱之為「Chimera」嘅戰士 – 將兩個靈魂混合所產生嘅勇士。

為咗成為「Chimera」，姐妹 Briar 與 Lute 為此作出犧牲，重生後兩姐妹靈魂綁埋一齊，令 Briar 得到超人般嘅力量及恢復力，Lute 則變成擁有神秘力量嘅幽靈。之後嘅故事當然就係由成為「Chimera」嘅兩姐妹對抗怪物，重光世界。

由於兩姐妹已經成為生命共同體，所以玩家基本上係同時控制兩位角色戰鬥。Briar 擅長近戰及連續技攻擊，連技中途可切換武器製作更大傷害及華麗度；Lute 則擅長使用異能控場，更可以透過「變身」進一步強化及發動必殺技，就好似作品《大劍》入面嘅「妖力解放」一樣。

另外，本作會有大家見慣見熟嘅武器及技能自訂元素，可解鎖及升級武器。當然，你越解鎖得多武器，連招時就更多武器選擇，亦即係 Combo 可以越複雜，傷害及華麗度亦都會進一步上升，努力地肝吧。

《Soulstice》已於 9 月 21 日推出，對應平台為 Xbox Series X|S、PS5 及 PC Steam，支援繁體中文。