用火柴人做嘅遊戲數量非常多，話晒簡單得黎可塑性高嘛。新作《Stick It to the Stickman》都係以火柴人做主角，但係玩嘅係於職場上「打拼」，講緊真係用拳頭「打」，畫面表現幾唔錯，下年先出，可以 Mark 定先！

《Stick It to the Stickman》由獨立團隊 Free Lives 開發，最早期喺獨立遊戲網站 itch.io 上推出「Prototype」版本，現時則由發行商 Devolver Digital 喺 Steam 上推出正式版，分類係平面動作遊戲。遊戲開始就問你「係咪搵工」，答「係」之後就會入職做公司最底層員工。由於公司玩弱肉強食制度，無幾耐你就被公司炒魷，被不合理壓榨、解僱，滿腔怒火嘅你決定用拳頭教整間公司乜野先叫「工作」。

遊戲主要玩法係平面動作，透過各種充滿辦公室特式嘅招數，逐步向上爬統治整間公司。有用釘書機射人、用熱咖啡掉人、大聲公聲波攻擊等等，亦有波動拳、旋風腿等大家見慣見熟嘅招式，更可以使用各種文具武器甚至係開剷車過關斬將，非常過癮！

原本「Prototype」版本只係公司內部向上層推進，打完贏老闆之後就完，但喺影片中見到正式版將會有其他版圖，同時加入其他視角玩法。另外，由於本作有 Rogue-lite 元素，每次遊玩都會隨機學到新野，加上有多種結局，重玩多次都無問題。

《Stick It to the Stickman》預計於 2023 年推出，對應平台為 PC Steam，同時於 itch.io 上有「Prototype」版本供免費下載。