講到吸血鬼遊戲，通常都係以戰鬥為主嘅動作遊戲，不過今次介紹嘅新作《Bloody Hell Hotel》就搞搞新意思，戰鬥只係配菜，主力反而係玩酒店經營。由於係吸血鬼經營，表面上係一間普通嘅酒店，實際上就梗係有各種唔見得光嘅手段，題材得意幾有趣味性。

《Bloody Hell Hotel》由獨立工作室 Unfold Games 開發，係一款酒店經營遊戲，採用第一身視點。玩家將扮演一隻沉睡數百年後甦醒嘅吸血鬼，起身時發現自己間大屋已經變成廢墟，為咗吸引人（食物）到此，決定將間屋改建成酒店，然後 Keep 住好評價吸引更多嘅人黎，周而復始。

重建酒店不外乎都係更換地板、牆紙、安裝電器及佈置傢具等等，由於玩家係吸血鬼嘅關係，絕大部份工作都可以用念力完成，工作效率極高。當有客人之後，你就要兼顧埋佢哋嘅飲食，喺酒店底層可以養不死牛擠奶、殭屍雞生蛋、種菜等等，然後再製作成美味嘅餐點送比客人，之後酒店規模擴大後，可騁請更多嘅吸血鬼擔任唔同崗位分擔工作，令你嘅酒店經營得更有效率。

上面講到用吸血鬼力量及聘請吸血鬼工作效率會極高，但係無論你用自己嘅力量定請人都係需要吸人血去補充能量，可以以送餐方式接近顧客施以毒手（吸完血啲肉就可以用黎整食物），又者做隻正直吸血鬼完全唔攻擊客人。要注意如果你想襲擊客人的話，都要事先觀察個別客人嘅特性，部份客人晚上會失眠，對周遭非常有警覺性，接近時要加陪小心。

除咗經營部份，地下有一個巨大嘅迷宮可供探索，入面會搵到改建升級酒店所需要嘅素材，當然仲有大量嘅敵人等緊你，所以喺進入前要先利用鐵匠工作坊去製作武器。當你喺迷宮入面得到素材後，就可以強化武器，配合吸血鬼能力逐步加大自己可探索嘅範圍。

《Bloody Hell Hotel》未有確實推出日期，但係已經開啟 Steam 商店頁面，有興趣嘅朋友可先放入 Wishlist。