最近一堆台灣製作遊戲都有非常唔錯嘅質素，早前推出嘅《Clut of the Lamb》（進擊羔羊傳說）、《Thymesia：記憶邊境》，都係令人充滿驚喜嘅作品，黎緊會推出嘅《Asterigos：失落迷城》又係質素甚高之作。預計於下年推出嘅《Recall : Empty wishes》，玩劇情懸疑解謎，玩法簡單但劇本幾吸引，喺最初公佈時已得到唔少獎項，又係一款要加入 wishlist 嘅遊戲。

《Recall : Empty wishes》由台灣團隊泡芙虎克工作室開發，係一款橫向懸疑劇情冒險遊戲。故事由主角林子晴細佬林子維突然失蹤開始，透過兩姐弟之間嘅兒時玩具「電話筒」回到過去，喺回憶世界中探索五位主要角色嘅過去，發掘埋藏於每個人心底中嘅願望，拼湊出每個人心中嘅秘密並揭開真相。

遊戲操作類似《返校》，都係透過平面移動、點擊、對話、探索、尋找道具等幾種方法去推進劇情。本作雖然有解謎元素，但係基本上無難度可言，主力都係以懸疑劇情去令玩家投入故事。例如主角一家表面風光，但實則係另一回事；主角雖然愛惜細路，但暗暗有妒忌細佬才華嘅情緒。總總人與人之間嘅關係，各自嘅秘密都非常引人入勝。

《Recall : Empty wishes》預計於 2023 年第二季推出，對應平台為 PC Steam，支援繁體中文，現時商店頁面有提供 Demo 免費下載。