本身中世紀用冷兵器劈友就有種特別嘅魅力，如果有埋放魔法、打龍等幻想世界元素就更正。《Stormrite》就係一款有晒上述咁多種元素嘅新遊戲，雖然公佈咗一段時間，但係日前就暗示會首日進入 Xbox Game Pass，並且積極與 Fans 活動，估計距離推出時間不遠了。

《Stormrite》由獨立工作室 Kelechi Apakama 開發，係一款動作角色扮演遊戲，採用第三身視點，開放世界。故事發生喺黑暗中世紀奇幻王國 Redreach，喺呢個地方有一種可控制時間、地球、冥界以及人類思想並感知任何事物嘅神祕力量「安魂曲」。本身係威脅王國嘅存在，但突然有一日消失得無影無踪，同時擁有神祕力量嘅水晶「Stormrites」被發現。玩家所扮演嘅角色就喺咁嘅背景下，一邊探索大陸一邊了解並運用「Stormrites」，創造屬於自己嘅故事。

戰鬥就主要分為近戰、遠程和魔法三種，但即使你揀任何一種都有多種武器或戰鬥風格。例如玩遠程可以揀傳統弓箭，亦可以揀更笨重但更強大嘅弩，甚至可以用匕首、飛刀混合近戰遠程戰鬥。想玩近戰嘅都有五種戰鬥風格玩，未來仲會加入更多數量供玩家選擇。魔法就可以玩直接攻擊型、召喚型或者輔助型都得。另外，本作將有同伴系統，可以帶上盟友並肩作戰，感覺類似《Dragon Dogma》。之後仲會有坐騎、專長技能等等，系統非常豐富！

《Stormrite》未有確實推出時間，不過就有標明快將推出。對應平台為 Xbox Series X|S、Xbox One 及 PC Steam，並已暗示會於首日加入 Xbox Game Pass。