個人對有得用機甲嘅遊戲特別有好感，即使爛如《Anthem》、某隻有戀愛育成元素嘅日系動作機甲遊戲，我都有玩過一排，證明幾有愛。明年將會推出一款機甲動作冒險新作《Bounty Star》，睇片就覺得唔錯，仲要首日落 Xbox Game Pass，點都要 DL 咗先啦。

《Bounty Star》由 DINOGOD 開發，係一款立體機甲動作冒險溝機地建設遊戲，採用第三身視點。故事發生喺一個擁有富饒農業及商業混合嘅地帶「無際赤地」，喺呢度充斥著暴力罪犯以及危險嘅野獸。為咗清除呢啲罪犯，政府騁請一班專業賞金獵人去處理佢哋，玩家所扮演嘅退伍士兵 Clem 就係屬於佢哋嘅一員，制裁罪惡成為此地嘅正義力量。

戰鬥方面玩家將操控強大機甲「沙漠猛禽 MKII」，可以換裝配備重型、高功率近戰武器、蒸汽動力液壓攻城武器、爆炸性火器等攻擊系統，亦可配備高速推進器、衝刺助推器、防暴盾牌等輔助防禦性裝備。雖然可裝備唔同配件，不過喺影片所見似乎固定左手遠程右手近戰武器，希望正式版可自由設定唔同嘅武器。

除咗戰鬥部份，本作仲有基地建設元素。由一開始嘅爛倉庫，透過收集各種素材，慢慢擴展改建成基地，當中包括製作供水供電系統、種植農作物、烹煮食物、飼養動物等等，亦要生產戰鬥用嘅彈藥、燃料，實行自給自足，與 Clem 一齊成長。

《Bounty Star》 預計於 2023 推出，對應平台為 年於 Xbox Series X|S、Xbox One、PS5、PS4 及 PC Steam，支援繁體中文，並會於首日加入 Xbox Game Pass 陣容。