Netflix 大受歡迎嘅韓國劇集《屍戰朝鮮》（舊名：李屍朝鮮）突然宣佈推出同名改編遊戲《Kingdom：The Blood》，暫時只有一條展示預告片，玩砍殺動作，睇落感覺還可以，不過未有發售日期，等 Fans 們期待下先。

《Kingdom：The Blood》由 Action Square 開發，係一款砍殺動作遊戲，採用第三身視點。遊戲改編自大熱劇集《屍戰朝鮮》，講述 16 世紀末朝鮮王朝爆發一場可怕瘟疫，染上此病嘅人死後會復活並變得非常嗜血及對人肉有異常渴求，整個朝鮮正面臨滅亡危機。

喺預告片中所見，使用原創新角，背景、服裝及建築都跟返原著設定。動作部份雖然未知實際系統，但片中所見有翻滾、擋格等動作，外國網友就話係「披住韓風皮嘅對面戰鬼」，官方就話擁有「Hardcore」動作系統，不過考慮到對應平台，相信 Hardcore 極都有個譜。

《Kingdom：The Blood》發售日暫未公布，對應平台為 PC、iOS 及 Android。