幾年前喺 Steam 上面曾經推出一款以海上漂流為主題嘅多人合作遊戲《Raft》搶先體驗，不過華文地區就唔太多人討論。日前佢哋趁住 Steam 做夏日特賣，順勢推出大型更新「最終章」，成功再次引起熱潮，如果未接觸過呢款遊戲嘅朋友，非常推薦趁今次特價入手，絕對係佳品黎。

《Raft》由瑞典團隊 Redbeet Interactive 開發，係一款海上漂流生存模擬遊戲，採用第一身視點，開放世界，最大支援八人線上合作。玩家會喺一隻小木筏中醒來，無野食無水飲，身邊只有一隻舊塑料製成嘅鉤，利用佢去捕捉海上任何嘅資源生存。

初始時玩家只係得隻勁細嘅木筏，但係海上有機會見到漂浮嘅浮木、塑膠垃圾與樹葉等資源，收集後可以擴建隻木筏。飲食方面，前期只能靠釣魚、淨水器等，後期就可以喺船上種植植物。漂流過程仲要不時提防鯊魚嘅攻擊，佢哋會咬爛隻木筏，所以要預先整定武器去保命。

喺海上漂流有機會見到陸地，有時喺無人島，有時喺被廢棄嘅城鎮甚至巨大都市。登島探索時會搵到各種設計藍圖或者係零件，可製作更多道具武器，甚至慢慢將隻木筏變做船。今次嘅更新除咗加入新角色外，玩家更可探索冰原、海底都市（無錯，呢隻 Game 可潛水探索海底的），同時加埋劇情故事最終章。所以之前無玩過嘅朋友，而家玩就真正可玩到 Ending。

《Raft》已於 6 月 21 日推出，對應平台為 PC Steam。