玩建設模擬類遊戲，入面嘅人仔好忙碌咁工作，睇住佢哋唔知點解覺得好治癒。日前公佈嘅新作《Mind Over Magic》玩起魔法學校，除咗要建設各種設施，仲要設計埋魔法課程，之後可以派畢業嘅學生出去戰鬥，成件事好 Harry Potter！

《Mind Over Magic》由美國工作室 Sparkypants 製作，係一款建設模擬遊戲。玩家將負責設計及建設自己理想中嘅魔法學校，由外牆到內部空間應用都要規劃。起好學校之後，仲要設計魔法課程，根據各學生嘅特性去設計，從而培育強大嘅魔法師。

除咗以上嘅工作，你仲要管理埋學生嘅日常，包括種植不知名嘅神秘植物、製造魔法藥水、認識失落嘅秘寶、復活不死生物、召換魔解生物並差遣佢哋等等，通過培訓各種魔法師就可完成對應嘅任務。

搞掂學校基本事務，培育到新嘅魔法師之後，仲可以派佢哋出去戰鬥。喺學院深處嘅地牢可前往唔同嘅地方探索，挑戰危險生物並獲得神器，透過培育 > 外出戰鬥循環，將獲得強大嘅魔法大軍，成為最強魔法學校，阿哇呾喀呾啦！

《Mind Over Magic》未有正式推出日期，對應平台為 PC Steam，有興趣嘅朋友可以先加入 Wishlist。