德國遊戲工作室 Daedalic Entertainment 表示，中世紀 RPG 遊戲《The Lord of the Rings: Gollum（魔戒：咕嚕）》目前開發進度理想，預計 2022 年冬季可將遊戲上架。

《The Lord of the Rings: Gollum》於 2019 年首次公佈，為一隻以 J.R.R. Tolkein 著作《魔戒》作為藍本而開發嘅遊戲。遊戲原本預計 2021 年推出，後來因為開發進度問題而延期到 2022 年末；玩家於遊戲中將飾演「咕嚕」探索人獸混集嘅「Mordor（魔多）」地域，當中需要利用到唔少「匿蹤」嘅技巧，而「咕嚕」嘅雙重人格元素亦有加入到遊戲裡面，係一隻 Fans 不容錯過嘅歷險作品。

不過，遊戲一直極少公佈新資訊，令到唔少玩家多次對開發狀況感到擔憂。工作室最近就正式於 Steam Q&A 回應玩家提問，表示遊戲將可如期上架，而目前Steam 平台上公佈發售日為 2022 年 9 月 2 日（視乎地區時差影響）。

工作室表示，《The Lord of the Rings: Gollum》傾向係一隻求生遊戲，因為作為「咕嚕」嘅玩家，作為史圖爾哈比人嘅一員，因此缺乏正面迎擊敵人嘅戰力，體能亦都比起「魔多」其他種族為弱，所以如何潛行、與敵人進行交涉等等鬼祟玩法，係遊戲嘅賣點之一。

《The Lord of the Rings: Gollum》將於 2022 年秋冬正式推出，對應平台為 Xbox One｜Series X｜S、PS4｜5 及 PC。