上年年尾介紹過，曾奪得多個獨立遊戲獎項嘅密室逃脫遊戲《Escape Simulator》，可以同好友線上共同協力解謎，質素又好，令到遊戲 Keep 住喺「極度好評」評價，而且銷售數字早前已突破一百萬，為咗慶祝遊戲叫好叫座，特別推出全新關卡回饋玩家。

《Escape Simulator》由獨立團隊 Pine Studio 開發，係一款密室逃脫解謎遊戲，採用第一身視點，最支援多人線上合作。顧名思義，本作目的係透過與場所內物品互動，收集情報以破解謎題脫出。遊戲中可互動嘅物品極多，更可以將物品移動、破壞焚毀等等。謎題整體難度中上，即使卡關亦可選擇提示，系統亦唔會直接同你講答案，而係逐步引導你解開謎題，非常貼心。

遊戲另一與別不同嘅地方自然係可多人連線解謎，但係並非處於同一空間各自解謎咁簡單。例如有一玩家與物品互動中，另一玩家可以同時間檢查該物件，並以滑鼠互動協助解謎，係真正意義上「共同解謎」，呢點遠勝其他同類遊戲，令人投入感更高。另外所有提示物件、訊息卡片等資訊性道具都可以釘喺螢幕上，超方便睇住黎思考解謎。

遊戲將會提供三個關卡，以各種古代陷阱為主題嘅「埃及迷宮」、逃出失去動力被吸進太陽嘅太空船「太空漂流」、維多利亞時代大宅「緣木宅邸」，每個關卡內設有多個房間需要破解。另外遊戲有關卡編輯器，透過工作坊可下載由其他玩家設計嘅密室，加上遊戲社群活躍，現時已經有接近 500 個關卡下載，真係有排都玩唔晒。

今次更新則會加入一個全新嘅關卡，題材來自工作室旗另一款益智遊戲「Cats In Time」。喺新關卡中玩家要想辦法修理教授 Tim Edger 時光機，但是喺嘗試修復設備時會遇到各種奇怪嘅問題，而你必需要喺 30 分鐘內完成任務。

《Escape Simulator》已於 10 月 19 日推出，對應平台為 PC Steam，喺商店頁面有試玩版免費下載，為慶祝過百萬銷量仲做緊 20% 折扣優惠，10 號完。另外之後都會推出家用機、VR 及手機版本，日期未定。