三月雖然有一堆大作推出，但係就獨欠恐怖遊戲，好在黎緊四月有隻高質野。新作《Remorse：The List》歷時五年開發，而且製作團隊之前專係整恐怖 Mod（整過《Half-Life》恐怖 Mod「Mistake -1」同《Half-Life 2》恐怖 Mod「Grey」），實力有返咁上下。今次叫做係第一款由頭到尾自家製作遊戲，自然落足心機，最正係滲透住陣陣《Silent Hill》味道，解謎又係以前果種玩法，令人期待！

《Remorse：The List》由 DeppreSick Team 團隊開發，係一款恐怖生存射擊解謎遊戲，採用第一身視點，開放世界。遊戲舞台位於一個匈牙利小鎮「Hidegpuszta」，呢度充斥大量恐怖怪物，玩家就因為要調查小鎮所發生嘅事件而來到此地，手上唯一嘅線索就係一份意外入手嘅神秘清單。喺初期係完全唔知份清單講乜的，但隨住喺小鎮調查獲得各種線索後，清單上所表達嘅內容逐漸清晰，帶領玩家逐步接近故事真相。

遊戲採用開放式世界，玩法亦都非常自由，玩家可自由選擇清單上任一部份進行探索解謎，過程中會遇到各種怪物襲擊，咁你就要利用執返黎嘅槍械或其他武器作出反擊，但係角色身上可携帶嘅道具數量有限，所以要拎幾多武器、彈藥、回復道具、解謎物品等等都要諗過度過。另外，根據玩家選擇進行嘅清單順序，會出現不同嘅故事發展，想知道晒所有真相應該要玩幾次。

《Remorse：The List》預計於 4 月 22 日推出，對應平台為 PC Steam。