寵物模擬遊戲並唔係咩新興類型，不過今次介紹呢隻《Wobbledogs》就有啲特別。雖然都係玩讓狗狗，但遊戲中出現嘅狗就有啲奇怪，因為佢哋全部都係基因特變狗，全部都有各式各樣騎呢嘅身體，好鬼過癮！

《Wobbledogs》由 Animal Uprising 開發，係一款立體寵物模擬遊戲。玩家可以飼養自己嘅虛擬寵物，一開始狗狗會正常地成長，但隨遊戲推進將會不斷演化，並帶來出乎意料嘅突變同行為，不過大家可以放心，呢啲變化並唔係講緊隻狗變到勁恐怖咁，反而騎騎呢呢都幾得意。

另外，喺模擬基因系統下小狗會好似《數碼暴龍》咁「進化」，佢哋會定期變成「蛹」，之後身體就會產生突變。呢個時候玩家可以透過餵食令腸道出現不同菌種，唔同嘅菌種會對狗狗嘅突變有各種影響，亦即係可以用人為嘅方式去「製作」唔同類型嘅狗狗。

除咗玩「培育」之外，養狗狗都要整返個安樂窩比佢哋。玩家可以建造一個適合佢哋成長嘅環境，搭建迷宮甚至整個靚靚花園都可以，亦可以佈置各種道具及裝飾品。順帶一提，遊戲中出現嘅狗狗都係經過實體模擬，會有獨特的性格，進而影響行為類型以及同其他小狗同道具互動嘅方式。亦因為咁，佢哋幾乎每個動作都很獨特，身體構造不同嘅小狗體驗世界嘅方式亦會有所不同，就算齋睇佢哋活動或者摸摸頭都幾唔錯。

《Wobbledogs》已於 3 月 16 日推出，對應平台為 PC Steam，支援繁體中文。