From Software 最新力作《Elden Ring 艾爾登法環》於 2022 年 2 月 25 日推出之後，一直係遊戲界的焦點；是次遊戲採用開放世界設計，可以探索的支線與地域極廣，而唔同程度嘅強敵都會據守於地圖上面，令到遊戲更具挑戰性。

根據外媒 PC Gamer 報導，於遊戲推出接近一個月後，目前 Steam 平台上面已開始遊戲嘅玩家當中，成功擊敗首個主線頭目「惡兆」嘅玩家終於超過 70％（數據黎自 Steam 平台全球遊玩資料）。

據說遊戲推出三日之後（2 月 28 日）擊敗「惡兆」玩家比率為 52％，同樣以推出三日後計算，《Elden Ring》與工作室其他作品相比，《SEKIRO 隻狼》推出三日後擊敗初頭目「鬼庭形部雅孝」比率大約為 60％；《DARK SOULS III》擊敗初頭目「冷冽谷的玻爾多 」的比率則為大約 64％。

到底無擊敗「惡兆」嘅玩家是否就等於技不如人？官方表示唔一定，因為已經有玩家搵到方法避開「惡兆」呢個頭目直接去艾東薇爾城挑戰「接肢葛瑞克」，亦有大量玩家醉心於地圖探索，遲遲都未打算去推主線；遊玩方式有好多種，不過工作室絕對樂見今次嘅《Elden Ring》吸引左大量新玩家落坑，各位讀者，你地又開左二周目未？