正常對戰遊戲大家打得多，轉個口味玩捉鬼唔知你哋又有無興趣？新作《Midnight Ghost Hunt》係一款人 vs 鬼嘅多人對戰遊戲，特別之處係一過午夜十二點後，所有弱雞幽靈會化身為厲鬼，殺返人轉頭，暫時未知平衡度如何，但睇落就幾得意，可以一試。

《Midnight Ghost Hunt》由 Vaulted Sky Games 開發，係一款線上多人對戰射擊遊戲，最大支援 4 vs 4，採用第一身視點。玩家們將分別扮演獵人以及幽靈兩隊，喺開始時幽靈隊好弱，但都可以附身於雕像、傢俱，甚至枱燈等小型物件，同獵人們玩「捉」（亦可以用身邊道具反殺），而獵人則可以用各種工具探測幽靈，並可按情況直接擊殺或者捕捉（獵人亦有各種強化配件，例如「Lightweight」額外爆發速度、Healing Aura 等等）。

但係當時間到達午夜十二點時，只要場上仲有幽靈存活，咁所有幽靈都會復活並變成強大嘅厲鬼，獵人們則變成獵物，要想辦法喺時間結束前逃離，而幽靈一方自然係要阻止獵人們逃走啦。齋睇概念係幾有趣，係怕最尾出黎好似之前隻垃圾《Evolve》咁極不平衡。

《Midnight Ghost Hunt》預計於 2022 年春季推出，現時已開放 Beta Test 申請，有興趣嘅可以試咗先，對應平台為 Steam。