喺今日嘅「State of Play」直播節目中，Capcom 發表最新作品《Exoprimal》。呢款遊戲以「最強對最兇」為概念，玩 5 vs 5 嘅 PvE 團隊對戰，齋睇概念就好正，但係試過《Anthem》嘅朋友相信都同我一樣，睇見就 Feel 到陣陣伏味……希望唔會真係伏啦。

《Exoprimal》由 Capcom 製作，係一款線上專用團隊對戰動作遊戲，採用第三身視點，最大支援 10 人線上協力對戰。遊戲舞台設定於 2040 年，世界各地都發生「恐龍爆發」，會憑空出現大量恐龍並四處襲擊人類。為咗對抗，人類開發出可預測「恐龍爆發」地點嘅新型 AI「利維坦」，以及強大嘅動力裝甲「強攻裝甲」獵殺恐龍。另外，根據開發介紹本作並無劇情模式，但當你持續遊玩就會推進故事並了解更多劇情。

「強攻裝甲」可分為三大類，分別擔任負責輸出嘅前鋒、負責坦同吸仇恨嘅護盾、負責回復及施加 Debuff 嘅支援，而且可於戰鬥中隨時切換裝甲以應付不同情況。現時公佈嘅裝甲分別有前鋒神射手、疾風；護盾路障及支援巫醫，不過喺影片中仲見到用狙擊槍同漂浮於空中嘅魔法師，所以肯定之後一定會有更多裝甲使用。

遊戲提供不同模式，但主要模式「恐龍生存戰」就係玩鬥快完成 AI 「利維坦」提出嘅任務，兩隊玩家可視情況協力對抗又或者直接擊殺敵隊。另外，Capcom 就講到明呢隻並唔係玩家等到頸長嘅《Dino Crisis》新作，但係 Trailer 入面有位紅色頭髮嘅女仔就同前者主角 Regina 有幾分相似，話唔定係同一人。

《EXOPRIMAL》預計於 2023 推出，對應平台為 Xbox Series X|S、Xbox One、PS5、PS4 及 PC Steam。