相信大家都忙住打《Elden Ring》同《Horizon Forbidden West》，然後去到三月又起碼三四隻大作要玩，咁就不如加多隻落 List 啦。今次介紹嘅作品《Expedition Zero》係一款於西伯利亞極地求生嘅恐怖遊戲，四野無人加上陰森氣氛令人不寒而慄，如果你都係鍾意玩呢類型遊戲嘅就要留意啦。

《Expedition Zero》由 Enigmatic Machines 開發，係一款恐怖生存遊戲，採用第一身視點。故事發生喺西伯利亞入面嘅異常區域，玩家需要進入呢個地區尋找遭廢棄嘅神祕研究設施，裡面曾經進行前蘇聯時期軍事實驗。你就要喺極地中以有限資源生存，同時對抗棲身於此地嘅怪物，完成任務兼保住條命仔離開。

根據官方描述，玩家將身存一套特殊戰甲，可強化之外更可加入其他裝備及模組，至於素材自然係靠狩獵得返黎。另外，玩家仲可以建立據點，製作可應付惡劣天氣嘅裝備，咁先可以擴大探索範圍，逐步接近故事中心。

《Expedition Zero》預計於 3 月 24 日發售，對應平台為 PC Steam，支援繁體中文。現時已提供免費試玩版下載，有興趣嘅朋友可以試咗先。