《KOF》系列推出多年，自《KOF 02》打後聲勢大不如前（《KOF 08 UM》曾經威過一排嘅），特別係上集《KOF XIV》質素麻麻，令到一種 Fans 對呢個系列處於心淡狀態。新一集《KOF XV》啱啱推出，製作團隊針對上集系統不足作出大幅改良，令到今集不論節奏、打法都更有以前嘅味度，絕對值得大家再比一次機會。

上集最為人所詬病嘅就係人物模組極之「膠」，今集人物造型雖然承襲上代人設，但係整體「膠」味大減（雖然仲係有），特別係新角「膠」味輕微，算係可以接受。另外，劇情上明顯想鋪路出新篇章，中段同爆機都有過場動畫，尾段更做咗條 2D 動畫，全語音（仲要 Defalut 係日文語音），質素都叫 OK，加上事前由大張正己做監督嘅宣傳動畫，真心有誠意。

今集改良細節嘅部份，最重要嘅系統係兩個，其中一個就係可隨時使出「EX 必殺技」。顧名思義，EX 必殺技係普通必殺技強化版本，除咗威力有所上昇外，部份招式更會改變特性，例如 Clark 嘅招牌技「Super Argentine Backbreaker」（41236 + K）EX 版會變為掉落地後再彈返起，可以再用其他技能追擊。喺今集 EX 必殺技由上集必需爆氣後才可使出，變為只需要扣減 50% 必殺技糟就可隨時使出，靈活度不但大增，更令基本玩法有大幅改變。

上集由於必需要爆氣後先可以使出 EX 必殺技，變相令到不熟悉爆氣系統嘅玩家處於劣勢。今集不但改為可隨時使出，更因為大幅加強連段減傷懲罰，間接令玩家捨棄以往用大量必殺技糟嘅一發入魂打法（今集必殺技糟仲升得好慢下），變為將普攻 > 必殺技 > EX 必殺技連段極限化。例如 Robert 連招 A – JHK > HP > 6LP > 214+K > 214 +KK > 6LK > 236+P > 623 +P 耗費 50% 必殺技糟，傷害 417；連招 JHK > HP > 6LP > 214+K > 623 +P > 2363214+P 耗費一條必殺技糟，傷害 425，由此可見連招 A 耗費少，傷害相約。所以大家睇高手比賽好多時都會以小技 > EX 必殺技入手為主力打法，亦都令不熟悉普攻>爆氣進攻嘅玩家瞬間輸出唔會相距太遠。

至於普通爆氣就同以往一樣，會增加攻擊力及崩值，特別係爆氣中途使用 EX 必殺技只係扣減爆氣時間，令到爆氣仍然有佢價值。必殺技接超必殺技則變成力量型角色核心連技，例如 Ralf 等角色，亦都因此區分各角色間嘅玩法，趣味大增。

另一個今集新增嘅重要系統就係「SHATTER STRIKE」。耗費一條氣，任何時間輸入 236+HPHK 將使出「粉碎打擊」，特性係使出時會有一下防禦判定，擊中對方後對手會出現大硬值，可立即施展反攻，有啲似《Street Fighter IV》嘅「Focus Attack」。因為有呢個系統，以往可以瘋狂細跳施壓嘅打法變得不再萬能，被壓嘅一方亦可睇準時機 Counter，令對決要估嘅地方大幅增加，非常好玩。

雖然加入重要系統令遊戲變得好玩，但係感覺上今集對指令入力準繩度、時間都嚴格咗，而舊有角色招式可確反嘅時機亦都變得有啲「微妙」，老手們需要重新學習及適應。至於網上對戰暫時感覺順暢，起碼延遲係可接受範圍，不過無得跨平台對戰呢點就有啲落伍，希望之後可以改善。

總結：

對於玩格鬥遊戲大嘅一代，《KOF XV》的確比我感覺到以往嘅爽快，對決亦都變得更鬥策略、反應，玩落竟然有種接近《Street Fighter IV》嘅 Feeling。雖然人設模組仍有巨大進步空間，但係製作團隊肯回歸初心，做返好最核心嘅戰鬥系統，已經值得支持，雖然要啲判定同確反位有點怪怪的，但仍然係推薦格鬥老手回歸嘅《KOF》。

《The King of Fighter XV》已經推出，對應平台為 PS5、PS4、Xbox Series X|S 及 PC，支援繁體中文。