一班朋友打機真係好歡樂，所以多人合作遊戲不嬲都好受歡迎，不過就多數都係得四人連機。今次介紹嘅作品《Core Keeper》係一款可多達八人合作嘅遊戲，而且玩法極之豐富，有耕種建造等生活元素，亦都可以組隊外出探險打怪，下個月頭就有搶先體驗，可以 Call 定朋友入手啦！

《Core Keeper》由瑞典遊戲團隊 Pugstorm 開發，係一款挖礦沙盒冒險遊戲，最大支援八人線上合作。玩家將扮演一位探險家，因為不明原因被困喺地底深處嘅古老洞穴。為咗生存，玩家們決定開採遺跡及探索資源，興建基地鍛造裝備，努力於地底生存。

要喺地底生存，要做嘅工作非常多，建議分工合作。我哋要做嘅第一樣野當然係採集礦石資源起據點先，之後就可以起耕種區，用探索過程搵到嘅種子種植食物。作物收成之後就可以拎去烹調，以據不同烹調方式會獲得額外能力加成。當基本設施搞掂之後，就可以組隊外出探索更深嘅地底區域，得到稀有礦石後就可以建造更多工具方便探索。

外出探險時都唔係得個「行」字，除咗有怪物等你之外，所有前進嘅道路都要自己加工，例如路上放置火炬及篝火，下次路經時就唔需要摸黑前進；要穿越地底湖就要建造橋樑等等。另外，喺據點嘅玩家亦不能掉以輕心，因為巨大 Boss 隨時會黎「踩場」，要將之擊敗防止佢哋破壞據點，幾過癮。

《Core Keeper》預計於 3 月 8 日進行搶先體驗，對應平台為 PC Steam。目前商店頁面有免費試玩版提供，有興趣嘅朋友可以試咗先決定買唔買。