恐怖大家都玩唔少，不過因為多數係外國廠商開發，就算係以現代做背景，都係用返外國社區、人物，投入感自然爭少少。日前改編自台灣恐怖驚悚電影《女鬼橋》（Netflix 有得睇）嘅遊戲《女鬼橋：開魂路》正式開放試玩，呢款以現代台灣真實校園靈異故事為背景嘅遊戲，由於港台兩地文化背景相近，處處充滿住大家熟悉嘅事物，投入感大增！

《女鬼橋：開魂路》由大宇資訊製作，係一款隱蔽類恐怖冒險遊戲，採用第一身視點。遊戲改編自台灣真實校園靈異故事，以十大校園恐怖傳說聞名嘅東湖大學流傳住一則傳說，學校內嘅一座橋上有位陰魂不散嘅女學生鬼魂。相隔多年，玩家所扮演嘅大學生們決定喺呢度舉行試膽大會，挑戰呢個校園傳說，然後身邊開始發生各種奇怪事件，到底呢班學生要點樣先可以逃過一劫？

玩家喺整個探索過程中隨時都要準備逃跑，因為女鬼會突然現身獵殺你，手無寸鐵嘅你，唯一可做嘅就係觀察四周，利用隱蔽空間躲避女鬼。喺學校入面除咗逃命，仲要探索四周尋找線索，蒐集關鍵物品破解機關謎題，順便探查校園內隱藏嘅謎團，拼湊出女鬼背後嘅真相。

根據官方資訊，本作真實地還原校園場景，加入現實生活細節，希望令玩家玩得更投入。另外現時喺 Steam 頁面已經開放免費試玩版，有興趣嘅朋友可以去下面遊戲頁面下載。《女鬼橋 開魂路》將於近日推出，對應平台為 PC Steam，支援繁體中文。