【遊戲介紹】國王TD正統續作《Legion TD 2》集攻防於一身多人合作或對抗

塔防類遊戲係現時頗受歡迎嘅類型，當中又有幾款歷史悠久嘅塔防深得玩家喜愛，所以就算過咗咁耐仍然會推出新作，例如我哋介紹過嘅《元素 TD 2》。今次我哋介紹嘅係另一款備受玩家喜愛嘅塔防新作《Legion TD 2》，當年玩家們稱之為《國王 TD》，本作為原作者以舊作基礎延伸嘅全新續作，機制及內容更加完整，證明好遊戲係歷久不衰。

《Legion TD》（國王 TD）係 Lisk 喺 2009 年時，用《Warcraft 3》地圖編輯器所製作嘅塔防地圖，推出後因為獨特刺激嘅玩法大受歡迎。之後 Lisk 組成獨立團隊 AutoAttack Games，並以舊作基礎延伸，加入更完整嘅機制及內容製作成續作《Legion TD 2》，並於舊年十月推出，截至現時得到六千幾條評論，維持於「極度好評」評價。

同正常 TD 一樣，敵人都係一波波來襲，目標係鬥快消滅敵方國王，但係本作就更注重「合作」嘅部份。玩法簡單講就係每隊都可以用手上嘅資源組建軍隊，保護國王並殲滅敵軍，而組成軍隊嘅戰士種類及技能有過百種，當中有前期強勢有啲後期勁，所以要同隊友溝通相量戰術。又因為玩家們要共同承擔防守敵隊攻擊波數，同時策劃進攻波數時機，又要保持經濟，整個過程非常忙碌，係一款要兼備戰略與團隊合作嘅策略對戰塔防遊戲。

由於係對戰型 TD，基本上每一局都會有所不同，玩家可以進行 2V2 或者 4V4 嘅團隊對戰。唔想打 PvP 嘅，本作有準備單人及合作戰役模式，另外仲有天梯系統、排行榜供玩家挑戰。雖然上面嘅介紹睇起上黎好似好 Hardcore，但實際上團隊喺競技與休閒之間嘅平衡做得唔錯，玩家累積遊玩經驗後將會有更多配搭上嘅想法，絕對令人越玩越上癮。