文字遊戲對一般人黎講可能代表冗長對白，超龐大劇本，基本上就係睇字睇到想死，但係今次介紹嘅遊戲可能令你改觀。台灣製作嘅《文字遊戲》係一款「純文字」遊戲，不過佢係以文字拼成圖像，當中又要拆解文字解謎，畫面豐富玩法有趣，更橫掃一堆獎項，仲只有繁體中文玩家先識玩，絕對值得支持！

《文字遊戲》由台灣獨立團隊 Team 9 開發，係一款「純文字遊戲」。雖然話係只有文字嘅遊戲，但係因為所有物件、人物、場景都係由文字所構成嘅圖像，而且「字」仍然會保留佢原有嘅意思。例如喺密室中，明確地標示「這裡沒有門」，但因為係文字遊戲，「門」字本身就係一度門，打開就可以離去。

上面嘅例子只係其中一種玩法，遊戲中有大量以文字構成嘅謎題，玩家要喺字裡行間找出端倪，刪去文字顛覆句義，或推移文字改寫事實。例如上面「這裡沒有門」，將句字中嘅「沒」字刪除變成「有門」，無中生有；又或者重組句子「穿梳字句，你將能碰倒機會 懷抱二心 重現失落的美好」，抽出「倒」字的人字部，將之與「二」組合成仁，改變句子意思解開謎題。類似嘅玩法仲有好多，解謎變化甚高，極為豐富。

《文字遊戲》曾獲巴哈姆特 ACG 創作大賽金賞 & 最佳創意獎、台北國際電玩展 Indie Game Award 最佳創新獎等多個獎項，實力非凡。喺舊年推出嘅免費前傳故事「第零章」更得到「壓倒性好評」評價，網友們更留言「為避免簡體缺字導致卡關，建議繁體中文遊玩」，嘲諷全開。

《文字遊戲》預計於 1 月 21 日推出，對應平台為 PC Steam。由於本作需了解文字部首、字詞前後差異，所以只建議繁體中文語系玩家遊玩。