近年有唔少遊戲角色身體都有殘缺，例如《隻狼》主角，黎緊嘅《Elden Ring》又係有角色玩換手，今次介紹嘅遊戲《Blind Fate: Edo no Yami》又係跛咗隻手再加埋盲，然後溝埋 Cyberpunk 風格玩機械武士，設定就幾有特色，玩落亦唔錯。早前就出咗序章免費試玩，絕對值得一試。

《Blind Fate: Edo no Yami》由 Troglobytes Games 開發，係一款橫向動作冒險遊戲，整體美術採用 Cyberpunk 風格。遊戲舞台設定於充滿機器嘅黑暗江戶時代，玩家扮演幕府殺人機器 – 生化武士「闇」，跟隨命令殺人……直到被一位強大嘅敵人擊敗，奪走視力及手臂。當你重新醒來後，失去視力嘅你重新「感受」呢個世界，發現「真實」並唔係自己所認知咁，於是踏上復仇之旅，發現被遺忘過去，揭開其失落嘅機械傳說。

雖然失去視力，不過呢款遊戲並唔係淨得黑色無畫面嘅。透過特殊傳感器「鬼之面具」，就會用迴聲模擬周遭世界，如果使用不同嘅傳感器仲可以檢測到敵人嘅弱點。另外除咗迴聲，仲可以使用聲音、氣味及熱量探索世界，會以不同顏色顯示相應情報，根據解說敵人會發出「欺騙性迴聲」，可能喺適當時候要切換至其他感官探索。

《Blind Fate: Edo no Yami》預計於 2022 年第一季推出，對應平台為 PC Steam。現時 Steam 上有開啟另一頁面，係本作嘅序章版本免費下載，由於呢個版本主要用於介紹及體驗遊戲，所以進度無法繼承至正式版。