遊戲種類有好多，不過人係貪心嘅，好多時會得一想二。好似《動物森友會》各方面都做得好好，然後你就會諗如果地圖大啲就好、如果有得打怪就好；又或者《暗黑破壞神 2》一代經典，你又會覺得有得起野種野自給自足都唔錯。如果你都有呢個諗法，今次介紹嘅作品《Len’s Island》可能滿足到你，因為佢有多種元素同時又做得幾平衡，仲好肝添！

《Len’s Island》由二人獨立團隊 Flow Studio 製作，係一款農場模擬動作冒險遊戲，採用開放世界，支援多人連線合作。遊戲結合戰鬥、建築、農業耕作以及探索等多種要素，喺呢座美麗嘅島嶼上開展屬於自己嘅新生活。熱愛和平嘅玩家可以專注於耕田起屋，透過開墾農田種植，收成後可以與城鎮中嘅居民交易獲取金錢，然後可以向商人買入新嘅種子，擴大你嘅農作物種類。閒時就可以喺島嶼上探索，開採礦石搜尋建材製作自嘅嘅家園，而且本作有獨特嘅建築系統，任何玩家都可輕鬆建造美麗小屋及家具。

嫌齋種野起屋悶嘅，可以向島上深處探索，有各種地下洞穴供玩家探索，戰鬥時仲會變成類似《Hades》咁玩（不過無 Rouge）。要去洞穴探索自然需要武器同裝備，種類分為輕、重近戰武器、弓箭同魔法杖，當中仲會有稀有度之分。初期可以向商人購入，更高級嘅就要喺深處區域獲得，甚至係搜集稀有素材製作，另外路上嘅補給品亦可以喺日常耕種獲得，亦即係話你喺島上做嘅所有野都係有關連的。

《Len’s Island》日前已經展害搶先體驗，未來預計會用兩年時間開發，增加更多任務、NPC 互動要素、地城探索、頭目戰等等。至於多人連線部份要去到正式版先有得玩，現階段只可以單機遊玩，遊戲對應平台為 PC Steam。