我哋喺年中介紹過，全新嘅類魂系遊戲《Lies Of P》日前有新實機戰鬥影片推出，內容以之前 α 測試內容為主。喺影片入面見到角色使用各種武器展示招式及部份戰鬥系統，充滿濃厚《黑暗靈魂》、《血源詛咒》風格，整體感覺不輸原祖魂系作品，令人期待。

《Lies Of P》由韓國工作室 Round8 Studio 開發，係一款「類魂系」高難度動作遊戲，採用第三身視點。劇本取材至意大利作家「卡洛·科洛迪」著名童話《木偶奇遇記》，故事時間點為 19 世界末被稱為「Belle Époque」嘅「美好時代」，舞台為法國。原本繁華而美麗嘅城市，因為出現疫病，一夕之間變成人間煉獄。

主角木偶「匹諾曹」於遊戲中化名為 P。製作出「P」嘅木偶師「爺爺」將 P 帶到車站後就失去蹤影，而覺醒嘅 P 則帶著「對抗疫病」嘅使命，以及「想要成為人類」嘅念頭，開始踏上旅途，並希望可以搵返「爺爺」。遊戲中玩家會遇上殘存嘅人類，當中會產生唔同嘅支線以及選擇，可能需要玩家選擇「講真話」定「講大話」，你嘅選擇都會導向唔同嘅事件結果，亦會影響最終遊戲結局走向。

遊戲可以話係暗黑版本嘅《木偶奇遇記》，P 係一個真人大小左手配有金屬手臂嘅高戰鬥力木偶。喺實機影片中，P 嘅金屬手臂可以施放強化 Buff、炸地大範圍攻擊等，甚至可安裝爪鈎將遠處敵人拉近擊殺，但未知可否如《隻狼》般飛黎飛去。

近戰武器種類暫時見到有軍刀、刺劍、曲刀、斧頭、大型鋸刀，每把武器攻擊速度、範圍、攻擊動作、硬直等各有不同，例如刺劍輕武器攻擊速度快、重武器起手慢但崩值極高等等，而敵人亦明顯有對刺擊、斬擊、打擊等抗性數值，影片中所見有一位敵人明顯弱刺擊，用刺劍可打到防禦崩潰。另外疑似有「戰技」存在，例如擋格後強反擊、儲力強力斬擊等等，亦有火槍一類遠距離武器使用。

《Lies Of P》正式發售日未定，不過 Steam 標註為「快將推出」，對應平台為 Xbox Series X｜S、PS5 及 Steam。