之前喺 E3 公佈嘅開放世界 RPG《Wartales》日前正式宣佈 Steam 搶先體驗日期，並且開放 Demo 體驗版免費下載，同時仲開始招募封測玩家。想試下進入中世紀開放世界，尋找寶藏落古墓探險嘅朋友要留意啦。

《Wartales》由獨立研發團隊 Shiro Games  製作，係一款回合制角色扮演遊戲，採用開放世界。遊戲舞台設定於一個叫做「Edoran」嘅中世紀帝國，本來國家非常強大，但因為一百年前一場瘟疫摧毀一切，曾經嘅榮譽與道德已被世人遺忘，剩低嘅只有強盜與混亂。玩家將飾演一名傭兵團團長，率領一群唔怕死嘅同伴喺呢個世界中戰鬥、追求財富，並努力於呢個只有滿滿惡意嘅嚴酷世界中求存。

遊戲中玩家可於廣闊嘅開放世界上四處移動，探索尚存嘅村莊藉此強化自己嘅裝備，亦可以喺各地接取任務賺取報酬資金，並招募夥伴加入自己傭兵團。雖然本作係中世紀，不過並無魔法存在，但係就有幻想生物登場。遇敵戰鬥採用戰棋式回合制進行，各職業都有相應嘅移動距離、攻擊距離、擅長武器、能力與技能組合等等，所以招募傭兵時要睇埋隊伍組成。需注意本作係有 Friendly fire，橫砍類攻擊會斬中身邊嘅隊友造成不必要傷害，所以企位都係本作一大考量。

除咗探索、戰鬥之外，玩家可以興建屬於自己嘅據點。有據點之後就可以投放資源去設置各類設施、工具等，透過收集材料就可以製作更強大嘅武器，隊伍有更強裝備後不但會提高隊伍士氣，最正嘅係自用以外更可以拎去賣，賺到更多錢之後再強化據點設施，咁就可以有更多種類道具販賣，玩玩下隨時變經營類遊戲，好特別。

《Wartales》預計於 12 月 2 日發售，對應平台為 PC Steam，現時已有 Demo 測試版免費下載，並開放封測玩家招募申請。