動作遊戲如《無雙》類都係以爽為主，今次介紹嘅獨立遊戲《LIBLADE》就係一款爽度極高嘅作品，初次公佈於《INDIE Live Expo Winter 2021》，配合用手制「霜冬菇」操作，夠新鮮感又過癮，可以一試。

《LIBLADE》由個人開發者 Eh 獨立製作，係一款橫向動作遊戲。故事講述主角身處嘅世界被不知名嘅人們入侵，為咗保護世界主角挺身而出與佢地戰鬥，並探索入侵嘅原因終結戰鬥。遊戲表面上同一般橫向動作差唔多，但係操作就幾有心思，必需使用有「雙冬菇」嘅手制（即係 Xbox、PS 之類手制），以冬菇劃出嘅軌跡決定動作。

玩家可以由左劃向右，角色就會使出由左斬至右邊嘅斬擊；不停旋轉冬菇就會變成大風車碾過路上嘅敵人等等。此外，仲可以瞄准擊落敵人射出嘅子彈，亦有對敵人施展中攻擊作出反擊等高階技術，擊敗 Boss 的話更可以透過技能樹解鎖新技能及能力。

遊戲畫面雖然畫麗，但特效太多感覺有啲「花」，流暢度同打擊感則做得幾唔錯，爽度十足。根據作者表示，初次遊玩到破關需時大約 5 – 7 小時，當摸索到遊戲點玩後時間可大幅縮短，非常鼓勵大家玩 Speedrun。

《LIBLADE》已經推出，對應平台為 PC Steam，注意必需使用有雙 Analog 嘅手制遊玩。