出色嘅城鎮規劃遊戲如《Humankind》、《Civilization》系列等都有「精神時光屋」之稱，即係玩果陣唔覺唔覺就用咗勁多時間。當然要令人玩到咁「忘我」，遊戲質素一定要高先做得到。今次介紹嘅遊戲《Factory Town》即將結束長達二年半搶先體驗階段，喺呢段時間入面因為遊戲質素甚高，備受玩家好評，絕對可列入「精神時光屋」之列。

《Factory Town》由獨立製作人 Erik Asmussen 開發，係一款城市建設模擬遊戲。主要玩法當然係開發城市，不過呢隻遊戲就有少少唔同，因為佢主打嘅係要玩家係建設同時盡可能將城市自動化。先由少數工人收集資源，透過建造管道、運輸帶等機器，令城市慢慢變成高效生產地。

最初發展時玩家要用最原始嘅人力運輸方式，賺到錢之後就可以投資研究解鎖新技術。雖然有多種技術，但係又唔代表越貴越先進越好，例如木製管線運送木頭、礦物等基礎資源比起金屬輸送帶更快更節省建設資源，但係有高低差地形就用唔到（特別係本作大多數資源都喺山上），亦都無辦法使用分離器分流輸送。但其實木製管線係可以同輸送帶混合使用，輸送帶亦可以配合抓取器進行分流增加輸送量，而且之後仲會有魔力管線、煤氣管線等等，每種方式都有優劣以及混合使用嘅方式，可以呢種細節令遊戲極之自由好玩。

除咗運輸方式，城鎮建設亦有不同考量。起摩天大樓的話，不但節省空間，商品亦會直接送到府上，但由於無辦法睇到每戶嘅需求，唔知道有乜貨物供應不足，但係起平房的話又要顧及建築面積、道路等，加上中期開始使用鐵軌運貨要考慮埋建築高度，整個設計比起同類作品更加複雜。

《Factory Town》正式版本將於 11 月 17 日推出，對應平台為 PC Steam。