Netflix 亞洲部副總裁 Minyoung Kim 早前接受外媒 The Hollywood Reporter 訪問，被問到韓劇《魷魚遊戲》熱播兼大受歡迎時，金氏表示，假如劇集受歡迎熱潮可以維持落去，公司會考慮將劇集改篇成電子遊戲作品。

《魷魚遊戲》於 2021 年 9 月 17 日全球上線，為 Netflix 最高收視劇集之一，亦因此成為 Netflix 最受歡迎的非英語原創劇集。金氏話公司會密切留意觀眾對於旗下作品嘅喜愛程度，從而去進行下一輪嘅市場推廣。目前 Netflix 已認真考慮《魷魚遊戲》是否要推出第二季，與此同時，有鑑於 Netflix 總公司於 2021 年初時公開表明有意涉足電子遊戲市場，所以《魷魚遊戲》將會係佢地考慮遊戲化嘅作品之一。

不過，Netflix 進軍遊戲市場，目前都係集中以手機平台為主，例如早前就公佈於波蘭先行推出《Stranger Things》劇集衍生嘅手機遊戲。Netflix 預告公司相關嘅手機遊戲最快會於 2022 年陸續面世，到底成品如何，《魷魚遊戲》又是否會如《Stranger Things》一樣推出手機遊戲，就有待 Netflix 進一步嘅消息公佈。