喺 2019 年果陣曾經推出一隻非常出色嘅遊戲《Katana ZERO》，雖然已經過咗兩年幾，但係 Steam 上面有三萬幾條評價，當中佔 98% 係好評，非常利害。受到玩家喜愛自然有佢原因，整款遊戲不論係戰鬥定係劇情都係一流，即使係音樂、難易度、耐玩性等等都有落心機，係極之值得入手嘅佳作。

《Katana ZERO》由 Askiisoft 獨立製作，係一款快節奏平面動作遊戲。故事中玩家扮演一名武士，以拯救被困科學家做開頭，表面上係見慣見熟嘅橋段，但係慢慢玩落去就發現有好多解唔通嘅謎團，再落黎就會好奇故事劇情嘅走向。加上遊戲以破碎方式敘事以及時空錯亂效果，越玩就越多「黑人問號」，令你不期然想更了解整個故事脈絡，而且更會因為劇情中嘅對話選項而改變故事內容甚至結局，係少有劇情豐富引人入勝嘅動作遊戲。

戰鬥部份爽度極高非常精彩，除咗用手中嘅武士刀砍殺敵人，亦可以用盡身邊嘅物品，例如係菜刀、花樽、玻璃樽等道具以投擲方式攻擊敵人、用煙霧彈掩蓋身影等，仲可以用刀反彈子彈，而且整體打擊感一流。另外，主角擁有預知未來嘅能力，玩家所有戰鬥都係發生於腦內嘅想像，亦因為呢個原因，「諗」得太多行動的話腦部會負荷不能，除咗完美解釋點解動作遊戲入面啲角色死極仲有之外，呢個能力同劇情亦都息息相關。

遊戲劇情同戰鬥做得出色，關卡設計及重玩性亦都非常優秀。喺遊戲中每次得到新技能或道具都會有小提示教學，但係安排巧妙唔會令你有種「白痴都識唔需要你教」嘅感覺。關卡嘅攻略方式亦都好自由，亦因為本作死亡嘅代價係極細，玩家可以好冷靜地先睇一次關卡排陣以及道具擺位等細節，再喺腦內實行。意味住玩家可以有大量發揮嘅空間，玩各種花式技巧甚至係 Speedrun。

《Katana ZERO》已經推出，對應平台為 Xbox One、Nintendo Swtich、PC Steam，支援繁體中文。