本身玩飛機射擊遊戲好廢，特別係新 Game 啲彈幕越黎越勁，真心玩唔掂。舊嘅射擊遊戲就有個好處，有難度得黎又唔會太高，好似我呢種飛機手殘黨仍然會玩得好歡樂。今次介紹嘅遊戲《Gley Lancer》係一款 92 年出品嘅舊作，但係推出時不論畫面、音樂、玩法都有別於當年嘅水平。如果係同我一樣，對射擊遊戲有興趣但又玩得麻麻，非常推薦試下今次嘅移植版。
《Gley Lancer》由 Masaya Games 開發，係一款橫向捲軸射擊遊戲。遊戲故事講述主角露西亞嘅父親被異星人擄走，露西亞為咗救人於是就違背上級命令，偷走一架尚處於調整中嘅新型戰鬥機出擊。雖然故事設定而家睇就覺得平平無奇，但當時主流都係王子救公主，女兒勇救父親其實係幾新鮮的。
遊戲玩法同一般橫向捲軸射擊遊戲差唔多，都係食強化、避子彈、不停射卒同埋不停死，而本作死亡就並非原地復活，會由關卡 Check Point 重新開始的。雖然主要玩法見慣見熟，但係本作喺細節位花咗唔少心思，例如機體有四段加速，喺狹窄地形慢速前進、太多敵彈或者被敵人包圍就要視情況加速走位，基本上好考玩家技術。另外射擊組合亦都非常豐富，有激光、束縛、燃燒器、5Way 等多達 49 個組合，同時亦有自動追蹤同完全手動控制供玩家選擇，就算係手殘黨都無乜問題，完全由玩家自己決定遊玩風格。
最後一定要提嘅就係本作嘅音樂係極之出色，就算相隔多年仍然好有印像。而本作嘅人設由「あいざわひろし」負責，佢喺某個界別可以話係活著嘅傳說，喺今時今日可以重溫呢位大師嘅作品真係非常之幸福！
人設絕對經得起時間考驗，果然係大師
《Gley Lancer》預計於 10 月 15 日正式發售，對應平台為 Xbox One、PS4 及 Nintendo Switch。
VJGamer總編，細細個已經蒲機舖，機齡甚深，熱愛電玩文化。