台灣遊戲發行商 Neon Doctrine 公佈全新遊戲《廖添丁 – 稀代兇賊の最期（The Legend of Tian Ding）》，為一隻橫向捲軸型動作遊戲，預計 2021 年 11 月 1 日上架，對應平台為 Nintendo Switch 以及 PC Steam。

1895 年至 1945 年為台灣嘅「日治年代」，當時有一位名為「廖添丁」嘅傳奇人物，據說劫富濟貧，勇於抗日，被日本人視為頭號通輯犯，相反地，則被台灣人民視為猶如羅賓漢一樣嘅「義賊」，以及「抗日英雄」，於台灣甚至擁有後人設置供奉嘅廟宇。「廖添丁」於歷史上留落黎嘅「史實」並唔多，不過可以話係台灣文化當中一個傳奇嘅存在。

根據呢一段歷史，台灣創遊遊戲工作室以「廖添丁」作為故事主角，並將佢短短一生化作遊戲。工作室早於 2004 年曾經推出名為《神影無蹤廖添丁》嘅 Flash 遊戲，今次推出嘅《廖添丁 – 稀代兇賊の最期》則係當時嘅重製版以及延伸版。遊戲以日治時期嘅台北市「大稻埕」作為舞台，玩家將化身「廖添丁」，以功夫搭配匕首、斧頭、手槍、長棒等武器去攻擊敵人，並可使用身上的紅巾去奪走敵人嘅武裝。

遊戲當中亦有能力點配置元素，以及物品收集要素。故事中會遇到的敵人，亦與當時嘅歷史背景息息相關，例如有貪污賣國嘅大臣、日本軍人、山賊土匪等等。作為一隻台灣本土製作嘅遊戲，《廖添丁 – 稀代兇賊の最期》亦加入咗唔少與歷史相關嘅場景及事件，例如當時新舊交替嘅建築特色、剛剛開始通行嘅鐵路等等，絕對係遊戲動作以外另一賣點。

《廖添丁 – 稀代兇賊の最期（The Legend of Tian Ding）》預計 2021 年 11 月 1 日上架，對應平台為 Nintendo Switch 以及 PC Steam。