九十年代受歡迎嘅遊戲類型除咗格鬥遊戲之外，橫向動作類都係主流之一。今次為大家介紹嘅遊戲《Okinawa Rush》就極有九十年代橫向動作遊戲味道，而且加入部份格鬥遊戲概念，加上現代嘅技術，成為一隻幾有特色嘅遊戲，現時仲有提供免費試玩版下載，可以試完啱心水先買。

《Okinawa Rush》由英國工作室 Sokaikan 製作，係一款橫向捲軸動作遊戲，支援單機二人合作。遊戲故事都係敵人入侵然後主角群保護家園果類，不過因為三位主角都係武術家嘅關係，所以唔需要用籐條、竹呢啲下三濫手段，用武術加上劍、雙節棍等武器去同敵人戰鬥。

由於遊戲以九十年代格鬥遊戲做設計概念，所以大家會見到熟悉嘅「波動拳」、「昇龍拳」，配合其他招式可以打出華麗嘅連技。另外本作核心系統係「格擋」，只要睇準時機用「格擋」，不論係敵人攻擊、投擲物甚至係陷阱都擋到，唔會有舊式橫向動作遊戲「硬食」情況出現。

作為一款動作遊戲，BOSS 戰自然係重點。遊戲中每位 BOSS 都有自己動作及武器，加上快速戰鬥節奏，過程既激烈又好玩，而且每關都有隱藏區，大量收集元素，三位角色嘅動作又有所不同，內容算得上豐富。

《Okinawa Rush》預定於 10 月 21 日推出，對應平台為 PC Steam 及 GOG.com，Nintendo Switch 版本則於 10 月 28 日推出，PS4 及 Xbox One 版本則於 10 月內推出。