由 Visceral Games 所製作嘅《Dead Space》系列一直都係太空恐怖遊戲嘅代表作，受到佢嘅啟發，喺 2019 年正式發表嘅《Negative Atmosphere》終於有新消息，日前放出一條三分半鐘長嘅實機遊玩片段，與初發表時有相當多嘅改進，令人期待。

《Negative Atmosphere》由英國獨立團隊 Sunscorched Studios 開發，係一款恐怖射擊生存遊戲，採用第三身視點。遊戲中玩家將身處一艘太空船，船上滿佈奇怪傳染病，感染者會變成食人異形生物，同時因為機器故障，所有人工智能機械人都失控變成具威脅性嘅機器。面對雙重危機，玩家所扮演嘅醫療官 Samuel Edwards 就要想辦法逃離呢個地方。

遊戲中玩家會面對異形同 AI，但係並非單純將佢哋殺死就得，仲要考慮到主角嘅心理狀態與精神，過度嘅殺戮會改變 Samuel Edwards 對事件嘅反應。另外由於主角係一位醫生，所以對藥物有深入了解，可以對常規藥物進行更具創造性嘅改造，或者轉化為更極端嘅藥物，用於拯救受傷者、對敵人使用或者強化自己。

《Negative Atmosphere》目前尚處於開發階段，發售日期未定，有興趣嘅朋友可以係 Steam 商店頁面加入 Wishlist 先。