由知名藝術家 Jakob Rozalski 所創作嘅受歡迎 Board Game《Scythe 鐮刀戰爭》為藍本，描述第一次世界大戰後架空幻想世界「World of 1920＋」嘅即時戰略遊戲《Iron Harvest》（鋼鐵收割）係今年較早時候已經出埋落家用機，不過就甚少有人提及。喺下個月呢款遊戲將會推出包含全 DLC 嘅完整版《Iron Harvest Complete Edition》，想試下用巨大柴油機甲廝殺嘅朋友要留意啦。

《Iron Harvest Complete Edition》係一款即時戰略遊戲。遊戲中描述第一次世界大戰後，歐洲各國力圖振作，為重建展開工作。與此同時，神祕勢力掘起並企圖破壞歐洲國家重建工程，想令世界再次陷入戰火之中，而喺鄉村一群農夫發現了巨大步行機器殘骸，曾經喺世界大戰戰場上橫行嘅恐怖機械……

遊戲中，玩家可選擇波蘭、俄羅斯、德國等三大勢力之一，率領幾十種不同單位上場迎戰。戰鬥中透過俯瞰視視點操縱部隊，喺地圖各地區收集鐵、石油等資源，藉此建設各類型建築，提升我方戰力，亦都可以放置機甲強化防衛網，阻擋敵人入侵。同其他 RTS 作品不同，喺戰場上可以利用掩護，將建築物炸成廢墟，亦可以用潛行等策略接近敵軍，使用雙足步行兵器蹂躪敵人。

《Iron Harvest Complete Edition》包含之前嘅 DLC《Operation Eagle》包括與「Usonia」派系相關戰役，三個可玩英雄及盟友，以及一張包含飛行部隊及防空部隊新地圖；《Rusviet Revolution》一個額外故事及四個單人/合作地圖。本篇則有三場大型戰役加 20 項以上嘅任務，九位英雄四十多種單位，並且有合作模式可與好友共同作戰。

《Iron Harvest Complete Edition》預定於 10 月 28 日上市，對應平台為 Xbox Series X|S 及 PS5，至於 PS4 及 Xbox One 版本則會於今年內上市。